Ukraina telükesizlik hızmeti vatandaşlarnı Rusiye ve işğal etken topraqlarınıñ ziyaretinden vazgeçmege çağıra.
Bu aqta Ukraina telükesizlik hızmetiniñ matbuat hızmeti bildire.
Müessiseniñ malümatına köre, «Rusiye FSBsi ukrainalılarğa qarşı çeşit cinayet işlenmesinen bağlı qabaatlavlarnı uydura».
Ukraina telükesizlik hızmetiniñ malümatına köre, Rusiye mahsus hızmetleriniñ riski ve diqqatı alanında ilk evelâ «arbiyler, akimiyet ve idare, uquq qoruyıcı ve kontrol organlarınıñ vekilleri, ATO iştirakçileri, milliy-vatanperverlik birleşmeleri ve areketleriniñ faalleri ve azaları» qala.
«Aynı vaqıtta, Rusiye mahsus hızmetleriniñ qanunsız areketleriniñ obyektleri Rusiyege ya da işğal etken topraqlarına barğan bütün Ukraina vatandaşları ola», – dep aytıla haberde.
Rusiye FSBsi UTH ihtarını izaatlamay.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
