Ukraina telükesizlik hızmetiniñ Qırım Muhtar Cumhuriyetindeki Baş idaresiniñ bildirgenine köre, Rusiye mahsus hızmetleri işğal etilgen yarımadanıñ memuriy sıñırına yaqın olğan Herson vilâyetiniñ rayonlarında «içtimaiy-siyasiy vaziyetni kerginleştirmege» tırışa.
Bu aqta Herson vilâyeti Kalançak rayonı memuriyetiniñ matbuat hızmeti tarqatqan UTH haberinde aytıla.
Ukraina quvet müessisesiniñ malümatına köre, «çetel mahsus hızmetleri devlet akimiyeti ve yerli idare organları hadimlerini itibardan tüşürmege tırıştı».
«Bunıñnen beraber, Ukrainanıñ vaqtınca işğal etilgen Qırım Muhtar Cumhuriyetine suv bermek içün kanalnı küçnen açacaq kütleviy qalabalıqlarğa yol açmaq içün regionnıñ cemaatınen oynav işi yapıla», – dep aytıla haberde.
Ukraina telükesizlik hızmetiniñ bildirgenine köre, Rusiye ve Qırım arasında tren seferleri açılğan soñ, Rusiye kütleviy haber vastaları «Ukraina qanunlarını bozıp», işğal altındaki yarımadağa Keriç köpründen ketmege çağırıp başladılar.
«İşbu areketlerniñ Ukraina Ceza kodeksinde olğan cinayet alâmetleri bar olğanına diqqatıñıznı celp etemiz. Bular: 109-ıncı madde (anayasa qurumını küçnen deñiştirüv ya da yıquv ya da devlet akimiyetini zapt etüv areketleri), 110-uncı madde (Ukraina topraq bütünligi ve toqunılmazlığına qast etüv)», – dep qayd etti müessise.
Keçken sene dekabr ayında Ukraina telükesizlik hızmeti, Rusiye FSBsi, 2014 senesinden soñ yarımadada qalğan sabıq Ukraina arbiyini celp etip, esas Ukrainada arbiy hızmetke qaytmağa yolladı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
