Ukraina telükesizlik hızmeti bildirgenine köre, Odesanıñ merkezinde neonatsist teşkilâtınıñ vekilleri Qırımtatar bayraq künü ve Ukraina Anayasası Künü arfesinde camini ateşke bermege planlaştıra ediler.
«Eki neonatsist Ukrainadaki cemaat-siyasiy vaziyetni kerginleştirmek ve anayasa qurumını devirmek maqsadınen terror ücümini kerçekleştirmege planlaştıra edi. Ukraina telükesizlik hızmetiniñ tahqiqatçıları Rusiye mahsus hızmetleriniñ temsilcilerinden şübhelene», – dep aytıla haberde.
Berilgen malümatqa köre, iyünniñ 25-nden 26-na keçer gecesi UTH hadimleri Odesanıñ merkezinde neonatsist teşkilâtınıñ eki iştirakçisini eki yaqıcı madde şişesinen islâm din binasını ateşke bermege tırışqanlarında yaqaladı. UTH bildirgenine köre, yaqalanğanlardan biri uzun zaman Rusiyede yaşağan soñ Ukrainağa keldi.
UTH malümatına köre, yaqalanğanlarnıñ yaşağan yerinde keçirilgen tintüv vaqtında yaquv vastaları, cep terminalları ve «terror ücümi azırlığını isbatlağan» defterler alındı.
Keçken afta Telükesizlik hızmeti bu neonatsist gruppasınıñ teşkilâtçılarından birini yaqaladı, dep bildirgen edi. Olarnıñ adları ve teşkilât adı aydınlatılmay.
Er yıl iyünniñ 26-nda qırımtatarlar Milliy bayraq kününi qayd ete. Bayram künü olaraq 1991 senesi iyünniñ 26-27-nde Aqmescitte ötkerilgen ekinci Qırımtatar Milliy Qurultayınıñ birinci künü saylânğan edi.
Qırımtatar bayrağı üzerinde altın tamğa tasvir etilgen kök bayraqtır. Tantanalı tedbirler em Qırımda, em esas Ukrainada, em çetele ötkerile.
