Ukraina telükesizlik hızmeti Tehrandan Kyivge ketken PS572 uçuşınıñ uçaq qazasınıñ eki sebebini baqmaqta: raketa darbesi ve terror ücümi. Bu aqta Ukraina telükesizlik hızmetiniñ reisi İvan Bakanov yanvarniñ 10-nda bildirdi, dep haber ete müessiseniñ matbuat hızmeti.
Bakanovnıñ aytqanına köre, raketa darbesinen bağlı versiya bir sıra sual doğura, dep haber ete Azatlıq Radiosı.
«TOR» zenit-raketa kompleksine ait raketa darbesine dair versiya bugün kerçekten de cemiyetniñ eñ büyük diqqatını celp ete. Faqat qoşma cevap talap etken bir sıra sualniñ peyda olması içün zenit-raketa kompleksini qullanuv talimatını açmaq yeterlidir. Laf raketa uçuşınıñ mesafesi, kompleksni idare etüv hususiyetleri ve diger şeyler aqqında kete. Bütün sualler şimdi baqıla», – dep qayd etti Bakanov.
Onıñ bildirgenine köre, terror ücümine dair versiyanı UTH «tafsilâtlıca ögrenip talil ete», faqat incelikleri aydınlatılmay.
«Şimdi tez hulâsa çıqarıp olamaymız, mevzu pek müim. Cemiyetke bütün tarafsız, teşkerilgen malümatnı bildirecekmiz, dep işandıra bilem», – dep bildire UTH reisiniñ aytqanlarını matbuat hızmeti.
Bakanov, uçaq qazasınen bağlı teşkerilmegen malümatnı tarqatmamağa rica etti.
«Ukraina halqara ava yolları» ava şirketiniñ PS752 seferli Boeing 737-800NG uçağı yanvarniñ 8-nde saba Tehrandan Kyivge yol alıp, İran paytahtınıñ halqara ava limanından çıqıp tüşti. 176 insan elâk oldı, 167-si yolcu ve 9 ekipaj azası edi. Elâk olğanlar arasında – 11 Ukraina vatandaşı (ekipaj azaları ve 2 yolcu).
Uçaq 2016 senesi yapıldı. Şirketniñ bildirgenine köre, bir problemi yoq edi ve yanvarniñ 6-nda uçuştan evel tehnik teşkerüvi yapıldı.
Ukraina Tış işler naziri Vadım Prıstayko, İrannen Ukraina uçağınıñ qazasını tahqiq etüv ve onıñ sebeplerini ögrenüvde eki memleketniñ tahqiqat gruppalarınıñ koordinatsiyası aqqında añlaştı, dep bildirdi.
Ukrainada yanvarniñ 9-nda İrandaki uçaq qazası sebebinden matem künü olaraq ilân etildi.
Daa evel bir sıra kütleviy haber vastası ABD ve diger memleketlerniñ istihbarat menbalarına esaslanıp, Ukraina halqara ava yolları ava şirketiniñ «Boeing» uçağı İran raketasınen tüşürildi, dep bildirdi, daa soñra bunı Kanada ve Büyük Britaniya liderleri de ayttı.
İran akimiyeti 176 insan elâk olğan Ukraina uçağı tüşürilgenine dair versiyanı inkâr ete.
