Ukraina telükesizlik hızmeti Donbastaki deñişim çerçivesinde azat etilgen Ukraina vatandaşlarınıñ cedvelini derc etti. Anda 12 arbiy ve 64 vatandaş bar, umumen – 76 Ukraina vatandaşı.
«Deñişim neticesinde Vatanğa qaytqanlar: 12 arbiy (üçü 2015 senesinden berli Donetsk ve Lugansk vilâyetleriniñ işğal etilgen rayonlarında apiste yattı); 64 vatandaş (on yedisi 2015-2016 senelerinden berli apiste yattı).
Ukraina telükesizlik hızmeti, «tutulğan bütün vatandaşlarnıñ evlerine qaytması içün elinden kelgenini yapacaqlar», dep qoştı.
Tutulğanlarnı deñişim Donetsk vilâyetindeki «Mayorsk» keçiş noqtasında dekabrniñ 29-nda kerçekleşti. Azat etilgen Ukraina vatandaşları andan Kyivge uçaqnen ketirilecek. Tuvğanları olarnı qarşılamaq içün «Borıspil» ava limanına yol alğanlar. Azatlıq Radiosınıñ mühbiri bildirgenine köre, tuvğanlar Kyivdeki Mıstetskıy Arsenal yanında avtobuslarğa mindi.
«DNR» vekili Darya Morozova, 52 arbiy esir ve vatandaş reinesi Ukrainağa berildi, dep bildirdi. Donetsk vilâyetiniñ bazı rayonlarına 60 kişi berildi.
Ukraina jurnalistleri deñişimniñ bu qısmına kirsetilmedi.
İşğal etilgen Ğorlivka yanındaki sıñırda «Mayorske» keçiş noqtasında dekabrniñ 29-nda tutulğan şahıslar deñiştirildi.
Dekabrde Parijde «normand formatı» sammiti keçirildi – Frenkistan, Almaniya, Ukraina ve Rusiye liderleri körüşti. Taraflar, Kyiv ve Moskva «er kesni er keske» formulası boyunca şahıslarnı dekabrniñ 31-ne qadar deñişecek, dep añlaşqan edi.
Ukraina prezidenti Volodımır Zelenskıy tutulğan şahıslarnı deñişim dekabrniñ 29-nda olacaq, dep tasdıqladı.
Üç taraflı bağ gruppasınıñ gumanitar alt gruppasındaki Ukraina vekili Valeriya Lutkovskaya, «İlovaysk, Debaltsevodan soñ dört yıl devamında esirlikte olğan balalarnı niayet alıp olurmız», dep bildirgen edi. Al-azırda resmiy deñişim cedvelleri yoq.
Dekabrniñ 23-nde Donbastaki zıddiyetni al etüv üç taraflı bağ gruppası «er kesni er keske» şeklinde deñişimni belgiledi.
Rusiye qoltutqan «DNR» temsilcisi Darya Morozovanıñ dekabrniñ 25-nde bildirgenine köre, olar Ukrainağa 53 insannı berecekler. Onıñ aytqanına köre, Ukraina tarafı «DNR» aydutlarına 87 insannı bermege razı oldı. Bu malümat şimdilik tasdıqlanmadı.
Dekabrniñ 18-nde Ukraina telükesizlik hızmeti Azatlıq Radiosınıñ muracaatına cevap berip, umumen Donbasta Rusiye qoltutqan aydutlarnıñ esaretinde 250 insan buluna, dep bildirdi.
