Yañı ukrain pasportı (ID kartı) olğan qırımlı abituriyentlerniñ esas Ukrainada oqumağa başlağanda problemleri olmamalı, çünki yaşağan yerini isbatlamaq içün bir sıra imkânı bar. Bu aqta Ukraina Tasil ve ilim nazirliginiñ aliy tasil departamenti reberi vazifelerini eda etken Svetlana Kretoviç Qırım.Aqiqatqa bildirdi.
«Qırımdan oqumağa kelgenlerniñ qayd olğan yeri ID kartında yazılmaması mümkün. Lâkin bir problem olmamalı: balanıñ işğal etilgen Qırımdan kelgenini isbatlağan bir sıra şey bar. Bu mesele çezile. Misal olaraq, yarımadada tasil alğanına dair vesiqa – o, bizde qabul etilmey, amma balanıñ Qırımdan kelgenini isbatlay. Bu ana-babasınıñ qayd olğan yeri yazılğan vesiqalarınıñ kopiyaları ola bile», – dep tarif etti Kretoviç.
Kretoviçniñ aytqanına köre, keçken sene de qırımlı abituriyentlerniñ ID kartları bar edi ve, onıñ aytqanına köre, problem çıqmadı.
«Al-azırda bizler «Qırım – Ukrainadır» tasil merkezleri üzerinden oquvğa başlav işini baqamız, buyruqlarğa bazı deñişmeler kirsetemiz, informatsion kampaniyanı başlatamız. Böyle problemlerge rastkelgen tasil merkezleriniñ vekillerinden bir teklif kelmedi ve oqumağa kelgen ve bizge telefon vastasınen muracaat etkenler şikâyet etmedi», – dep qoştı Tasil nazirliginiñ vekili.
Nazirlikniñ hatırlatqanına köre, esas Ukrainada oqumağa istegen abituriyentler ya da ana-babalarınıñ bir suali ya da problemi peyda olsa, olar nazirlikniñ sıcaq ağına ya da «Açıq siyaset» fonduna telefon ete bile.
Daa evel «Almenda» ukrain vatandaş maarifi merkeziniñ yolbaşçısı Valentina Potapova Qırım.Aqiqatqa intervyü berip, qırımlı abituriyentler bu sene problemlernen rastkele bile, çünki ID kartlarınıñ ilâvelerinde Qırımda qayd olğanı yazılmay. Qırım sakinleri, Ukraina qanunlarına köre, işğal
etilgen topraqnıñ sakinleri olıp, esas Ukrainada qolaylaştırılğan programma boyunca ve imtiyazlardan faydalanıp oqumağa kire bile, lâkmn Qırımdan olğanını vesiqalarnen tasdıqlamalı, dep qayd etti Potapova.
2018 senesi iyün ayından sentâbr ayına qadar 35 «Qırım – Ukrainadır» tasil merkezi çalışqan edi. Ukraina Tasil ve ilim nazirligi Qırım ve Donbastan kelgen abituriyentler içün adım-adım talimatlarnı derc etti.
