Rusiye işğal etken Qırım cenk yolunen qaytarılamız, dep ayttı Ukraina Tış istihbarat hızmetiniñ sabıq yolbaşçısı Viktor Gvozd Qırım.Aqiqat Radiosınıñ yayınında.
Onıñ aytqanına köre, Rusiye Qırımnı arbiy baza, «öz geopolitik maqsadlarda batırılmağan uçaq gemisi» olaraq qullana.
«Onı (Qırımnı – QA) cenk yolunen qaytarmaq imkânsız ola, kimse cenk başlatmaycaq. Mence, Qırımnı Putin olğance qaytarmağa imkânsızdır. Yañı nesil öse, dünya deñişe. Almaniya bölüngende olarnı 40 yıldan soñ birisi birleştirir dep tüşüngenler bar edimi? Başqa taraftan, Şimaliy ve Cenübiy Koreya. Bu devamlı olacağını añlamaq kerekmiz, – bu meseleni kimse ne bugün, ne yarın, ne o birisi kün al eter», – dep qayd etti Viktor Gvozd.
Daa evel qırımtatar halqınıñ lideri, Ukraina halq deputatı Mustafa Cemilev Kyivde «Ukrain cemiyeti ve Qırım – kelecekke baquv» açıq munaqaşasında işğal etilgen Qırımnıñ Ukraina kontroline qaytması cenk yolunen olamaz, çünki «yarımada ealisiniñ büyük qısmı yoq etilecek», dep ayttı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
