Sabıq Ukraina Tış işler naziri Pavlo Klimkin Rusiyedeki ilâvesinde Qırım ve Aqyarnı Rusiye toprağı olaraq qayd etken Apple Amerika şirketiniñ gacetlerinden vazgeçmege çağırdı.
«Apple Qırımnı Rusiye olaraq tanımağa azır olsa, onıñ mahsulatından vazgeçip olursıñızmı? Başqasına keçemiz, bunı ise artıq tanımayıq demege küç yetermi? Jobs yoq). Böyle brend 1 nomer olamaz, sağlıqnen qalıñız!», – dep yazdı Klimkin Twitterde.
Apple şirketi, Rusiyede Qırım ve Aqyarnı «Ava» ilâvesinde «Rusiye» toprağı olaraq qayd etip başladı. Esas Ukrainada ve işğal altındaki yarımadada Aqyar, Aqmescit, Keriç ve diger şeerler ne Ukraina, ne de Rusiye olaraq qayd etile.
Ukraina Tış işler naziri Vadım Prıstayko Apple Amerika şirketiniñ ilâvelerinde «Rusiyege ait» Qırım ve Aqyarğa cevap berdi.
Amerika şirketi bunı daa izaatlamadı. Qırım.Aqiqat, Apple şirketine izaat almaq içün muracaat etti.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
