Ukraina Tış işler nazirligi Qırımnı işğalden qurtaruv strategiyasını azırlay. Şimdilik onıñ tek leyhası bar, qaralama şekli, amma Milliy telükesizlik ve mudafaa şurası, ükümet ve Prezident ofisiniñ teşebbüsleri yardımınen kenişletilecek ve toldurılacaq, dep bildirdi tış işler naziri Dmıtro Kuleba «FAKTI» neşirine.
«Daa keniş ve tafsilâtlı işğalden qurtaruv planında em iç siyaset, em qanun deñişmeleri olmalı… Bütün iştirakçiler – Tış işler nazirligi, Vaqtınca işğal etilgen topraqlarnıñ reintegratsiya meseleleri nazirligi, Prezident ofisi – ğaye ve planlarımıznı bir vesiqağa toplaycaqmız. Planımız yazıldı, amma finalı daa yoq», – dep añlattı nazir.
Kuleba, strategiya üzerindeki işke nazirniñ birinci muavini Emine Ceppar da qoşulır, dep ümüt ete. Onıñ aytqanına köre, «onıñ Qırımnen bağlı teklifleri çoq».
Ukraina devlet yolbaşçısınıñ saytı bildirgenine köre, Emine Cepparnıñ namzeti Ukraina Tış işler nazirliginiñ birinci muavini vazifesine keliştirilgen edi. Cepparnıñ Qırım.Aqiqatqa bildirgenine köre, o, işğal etilgen Qırım ve devlet diplomatiyası meselelerinen oğraşacaq.
Kyivdeki soñki matbuat konferentsiyasında Ukraina prezidenti Volodımır Zelenskıy Ukraina işğal etilgen topraqlarını, hususan Qırımnı kontroline qaytaruvdan vazgeçmey, dep işandırdı.
Baş nazir muavini – Ukrainanıñ vaqtınca işğal etilgen topraqlarınıñ reintegratsiya naziri Oleksiy Reznikov Qırım.Aqiqat Radiosınıñ yayınında Ukraina akimiyeti Qırımnıñ işğalden qurtarıluvınen bağlı muzakereler içün halqara meydançıqnı qurmağa istey, dep qayd etti. Amma onıñ ne vaqıt ve nasıl bir formatta olacağını tahmin etip olamay.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
