Ukraina Tış işler nazirliginiñ Avropa integratsiyası meseleleri naziri Olena Zerkal bildirgenine köre, Ukraina nazirligi narazılıq notasını azırlap, Rusiyeden FSB tarafından zapt etilgen 24 ukrainalı deñizci ve üç arbiy gemi azat etilecek kün ve yerni aytmasını talap ete. Bu aqta Zerkal «Radio NV» yayınında bildirdi.
«Rusiye Federatsiyasına diplomatik nota azırladıq. Bugün o, Rusiye Tış işler nazirligine ketecek. Gemilerimizni nasıl, ne vaqıt, qayda ala bilemiz ve konsullarımız deñizcilerimizni «Lefortovodan» ne vaqıt ala bile, dep soraymız», – dep qayd etti Zerkal.
Tış işler nazirliginiñ vekili qayd etkenine köre, Ukraina öz notasında Halqara deñiz uquqı mahkemesiniñ buyruğına esaslana.
«Bugün Rusiye Federatsiyasına muracaat etip, bunı acele yapmaq kerekler, dep bildiremiz», – dep qayd etti Zerkal.
Halqara deñiz uquqı mahkemesi mayısnıñ 25-nde Gamburgda Rusiye zapt etken ukrainalı deñizcilerniñ davası baqılğan toplaşuvda Rusiyeni arbiy gemilerni acele azat etip, Ukraina kontroline qaytarmasına qarar berdi.
Ukraina prezidenti Volodımır Zelenskıynıñ mayısnıñ 25-nde bildirgenine köre, BM Halqara mahkemesiniñ zapt etilgen ukrainalı deñizci ve gemilerniñ azat etilüvi fermanınıñ Rusiye tarafından yerine ketirilmesi «Rusiye reberligi tarafından Ukraina ile zıddiyetni toqtatmağa azır olğanınıñ ilk kerçek işareti ola bile».
Rusiye Tış işler nazirligi BM Mahkemesiniñ zapt etilgen ukrainalı deñizcilerniñ davasını baqmaq aqqı yoq, dep bildirdi.
2018 senesi noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
