Ukraina Tış işler nazirliginiñ bildirgenine köre, Rusiye 70-ten ziyade ukrainalını qanunsız şekilde tuta. Radio Svobodanıñ muracaatına berilgen cevapqa köre, Qırım yalısında Rusiye tarafından zapt etilgen 24 ukrainalı asker sayılmadı.
«2019 senesi fevralniñ 6-na qadar 70-ten ziyade Ukraina vatandaşı Rusiye Federatsiyası tarafından uydurılğan davalar boyunca qanunsız şekilde tutula: Rusiyede eñ az 30 insan (Keriç boğazı yaqınlarında esir alınğan Ukraina Arbiy-deñiz quvetleriniñ 24 askeri sayılmay) ve vaqtınca işğal etilgen Qırım Muhtar Cumhuriyeti ve Aqyarda 40-tan ziyade kişi», – dep bildirdi Tış işler nazirligi.
Ukraina Yuqarı Radası reisiniñ birinci muavini İrına Geraşçenko bildirgenine köre, Ukraina, Rusiyede ve işğal etilgen Qırımda tutılğan ukrainalı reine ve siyasiy mahkümler azat etilsin dep, Ukraina devletine qarşı cinayet işlegen 60 Rusiye vatandaşını bermege azır.
Uquq qoruyıcılarnıñ malümatına binaen, Rusiye ve o ilhaq etken Qırımda 60-tan ziyade Ukraina vatandaşı siyasiy sebeplerden dolayı serbestlikten marum etilgen buluna. Ukraina Tış işleri nazirligi Rusiyege, anda tutulğan ukrainalılarnı azat etmesi talabınen 300-ge yaqın nota yolladı.
