Qırımdaki suv qıtlığınıñ sebebi yarımadanıñ Rusiye tarafından askeriyleştirilüvinen bağlıdır, dep tüşüne Ukraina Tış işler nazirliginiñ spikeri Oleg Nikolenko.
«Qırımda turmuş qullanıluvı içün suv resursları yeterlidir. Problem onıñ askeriyleştirilüvi sebebinden kerginleşti: arbiy baza ve Rusiye Federatsiyasınıñ arbiy-sanayı kompleksi müessiseleriniñ inkişafı. Rusiye arbiyleri qırımlı vatandaş ealisiniñ esas ihtiyac qarşılanmasını telükege oğrattı», – dep ayttı Nikolenko «Ukrinformğa».
Ukraina Tış işler nazirliginiñ spikeri aytqanına köre, bu işğal etilgen Qırımdaki Rusiye siyasetiniñ «bozucı tabiatını» isbatlay. O, Rusiye halqara uquq normalarına köre yarımadadaki vaziyetten mesüliyetli ola, dep hatırlattı.
Oleg Nikolenko, Dnipro suvı Qırımğa yarımadanıñ askeriyleştirilüvi ve işğali bitken soñ berilecek, dep qoştı.
Hatırlatamız, Rusiye Tış işler nazirligi malümat ve matbuat bölüginiñ müdir muavini İlya Timohov Ukraina akimiyetiniñ işğal etilgen Qırımnen bağlı areketleri «halqara kerginlik» artmasına yol aça, dep bildirdi. O, yarımadanıñ «suv qamaçavını» da böyle areketlerden biri dep adlandırdı.
Ukraina Qırımnı işğalden qurtaruv halqara meydançığı olacaq «Qırım platformasını» qura. Rusiye reberligi ve Kreml kontrolindeki yarımada akimiyeti bu qararnı tenqit ete. Mayısnıñ 20-nde Ukraina prezidenti Volodımır Zelenskıy matbuat konferentsiyasında «Qırım platforması» sammitine 30 memleketniñ vekilleri kelecek, dep qayd etti.
Rusiye akimiyeti Kyivni Qırımnıñ «suv qamaçavında» qabaatlamağa ve Ğarpnı bunı körmegeninde yüzlemege devam ete.
Ukrainanıñ BM monitoring missiyası Qırım yarımadasınıñ işğali sebebinden «Rusiye Qırımdaki insanlarnı suvnen temin etüvden mesüliyetli ola», dep israr ete.
Qırımnıñ suv teminlevi
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
