Ukraina Tış işler nazirligi Qırım ve Donbasnıñ bir qısmı işğaliniñ yedinci yılında infografik yapıp, yarımadada olğan Rusiyeniñ arbiylerini kösterdi.
Bu aqta Ukraina müessisesiniñ matbuat hızmeti haber ete.
İnfografikte qayd etilgenine köre, Rusiye Qırımda 195 tank, 410 zırhlı maşina, 283 top sisteması, 100 cenk uçağı, 50 vertolet, 68 gemi ve kater yerleştirdi.
Ukraina Tış işler nazirliginiñ esaplarına köre, Qırımda 32500 Rusiye arbiyi buluna. İşğal devamında Rusiye 11 kere askerlikke çağırdı, 28 biñ qırımlı Rusiye ordusına çağırıldı, Rusiyede askerlik yapmağa istemegenlerge qarşı 163 cinaiy dava açıldı.
Tahminen 50 biñ ukrainalı Qırımnı terk etti. Rusiye 500 biñ vatandaşını Qırımğa ketirip yerleştirdi, dep bildirdi Tış işler nazirligi.
Fevralniñ 26-nda cemaatçılıqnıñ teşebbüsi ile «Qırımnıñ Rusiye işğaline qarşı tirenüv künü» qayd etile. Şu künü Ukrainada ve dünyada qırımlılarğa ve memleketniñ topraq bütünligine qoltutuv aktsiyaları, munaqaşa, forum, miting ve yürüşler keçirile.
2014 senesi fevralniñ 26-nda Qırım Muhtar Cumhuriyetiniñ Yuqarı Şurası ögünde Ukraina topraq bütünligine qoltutuv mitingi olıp keçken edi. Miting iştirakçilerine qarşı Rusiye tarafdarları, hususan «Rus birligi» firqası çıqtı.
2020 senesi yanvar ayında Ukraina Yuqarı Radasınıñ deputatları, olarnıñ arasında Ahtem Çiygoz ve Rustem Umerov, Ukraina prezidenti Volodımır Zelenskıyge muracaat etip, Qırımnıñ Rusiye işğaline qarşı tirenüv kününi devlet seviyesinde resmiy şekilde belgilemesini rica etti.
2014 senesinde Qırım ilhaq etilgen soñ Rusiye yarımadada muntazam surette arbiy talimlerni ötkere. Ukrainanıñ Baş ştabında, Rusiyeniñ Qırımdaki areketlerine qanunsız deyler.
