Ukraina Tış işler nazirligi, BM Halqara mahkemesiniñ işğal etilgen Qırımda Qırımtatar Milliy Meclisiniñ yasağını lâğu etüv qararını yerine ketirmegen Rusiyege qarşı sanktsiyalarnı quvetleştirmege çağıra.
Ukraina Tış işler nazirligi, dört yıl evelsi Rusiye kontrolindeki Qırım Yuqarı mahkemesi Meclisni ekstremist teşkilâtlar cedveline kirsetip, faaliyetini yasaqladı, dep hatırlattı.
«Daa soñra işğalci devletniñ eñ yüksek mahkemesi bu qanunsız qararğa qol tuttı. Qırımtatarlarnıñ temsiliy icra organınıñ işğalci akimiyet tarafından yasaqlanması halqara gumanitar uquqı ve insan aqlarını daa bir kere bozdı, ırqiy ayırımnıñ ve yarımada işğali ve 2014 senesi martnıñ 16-nda olıp keçken sahte «referendum» neticelerinen razı olmağanlarnıñ taqip etilüviniñ bir qısmı oldı», – dep aytıla Ukraina nazirliginiñ haberinde.
Ukraina Tış işler nazirliginiñ qayd etkenine köre, Qırımdaki Rusiye akimiyeti Qırımtatar Milliy Meclisiniñ azalarını, qırımtatar milliy areketiniñ faallerini «miting ve toplaşuv qanunı bozulmaycaq», dep tenbilemege devam ete.
«2017 senesi aprelniñ 19-nda BM Halqara makhemesi çıqarğan buyruğınen Rusiyeni «qırımtatarlarnı temsiliy qurulışları, hususan Meclisni saqlap qalmaq imkânlarını sıñırlaycaq qararlarnı qabul etmesinden ya da desteklemesinden vazgeçmesine» mecbur etken edi». Rusiye bu qararnı üç yıldan berli körmemezlikke ura. Fermannıñ Rusiye tarafından yerine ketirilmemesi BM Halqara Mahkemesi tarafından dava temeli baqılğanda baqılacaqtır», – dep qayd etti müessise.
2016 senesi Rusiye kontrolindeki Qırım Yuqarı mahkemesi, soñra da Rusiye Yuqarı mahkemesi qırımtatarlarnıñ temsiliy organı olğan Meclisni yasaqlamağa qarar aldı. Onı Rusiye topraq bütünligini bozmağa tırışa ve insanlarnı qorquza dep, ekstremist teşkilât dep sayğanlar.
Meclis yasağı teklifi işğal etilgen Qırımnıñ sabıq prokurorı Natalya Poklonskayağa aittir.
2017 senesi Ukraina BM halqara mahkemesinde Rusiyeni Ukrainadaki terrorizm tedbirlerine para bergeni ve qol tutqanı, em de Ukrainağa qarşı istilâ yapıp, ırqiy ayırımda iştirak etkeni sebebinden mesüliyetke çektirmek içün oña qarşı dava açtırdı.
Ukraina, BM Halqara mahkemesine muracaat etip, vaziyetniñ acele olğanına emiyet berip, vaqtınca tedbir almağa rica etti. 2017 senesi aprelniñ 19-nda mahkeme Ukraina talaplarınen bağlı Rusiyege qarşı muvaqqat tedbirlerini kirsetmege qarar aldı.
Vesiqada Rusiyeden Meclis faaliyetini yasaq etmek qararı ile qırımtatar halqınıñ menfaatlarını temsil etmesi mevzusında aq-uquqlarınıñ bozulmasını toqtatmağa ve işğal etilgen yarımadada ukrain ve qırımtatar tillerinde tasil berilmesini temin etmekni talap etti.
