Ukraina Tış işler nazirligi, Rusiye tarafından qanunsız tutulğan şahıslarnı azat ettirmek ve apiste olarnıñ aqlarını qorumaq içün halqara basqınıñ quvetleştirilüvine yardım etecek tış siyaset areketlerini koordinatsiya etmege planlaştıra. Bu aqta Ukraina Tış işler naziriniñ birinci muavini Emine Ceppar bildirdi.
Nazirlikniñ matbuat hızmeti bildirgenine köre, iyülniñ 1-nde Rusiye tarafından ukrainalı siyasiy mabüslerniñ azat etilüvi halqara areket platformasınıñ tesis toplaşuvı video konferentsiya formatında olıp keçti.
«Toplaşuv vaqtında iştirakçiler Rusiye tarafından qanunsız tutulğan şahıslar ve aqlarınıñ qorçalavı meselesinde aktual vaziyetni muzakere etti, yaqın kelecekniñ vazifelerini belgiledi. 2020 senesiniñ soñuna qadar halqara adise-vaqialar ve tedbirler çerçivesinde vaqtınca işğal etilgen Ukraina topraqlarında Rusiye tarafından insan aqlarınıñ bozuluvı ve Ukraina vatandaşlarına qarşı repressi areketlerniñ aydınlatıluvı planlaştırıla», – dep aytıla haberde.
Toplaşuvda Reintegratsiya nazirligi, Ukraina prezidentiniñ ofisi, Ukraina prezidentiniñ Qırım Muhtar Cumhuriyetindeki temsilciligi, Ukraina Yuqarı Radasınıñ insan aqları vekâletlisi, Qırımtatar Milliy Meclisi, ükümetten tış aq qorçalayıcı teşkilâtlar ve qanunsız tutulğan şahıslarnıñ tuvğanları iştirak etti.
İyün ayında Ukraina prezidentiniñ Qırım Muhtar Cumhuriyetindeki temsilcilik Rusiye işğal etken Qırımda siyasiy sebepten açılğan 94 cinaiy dava aqqında bildirdi, 72-sinde qırımtatarlar bar.
Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısı aydınlatqan edi: 113-ten 115-ke qadar, 80-den çoq – qırımtatarıdır. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.
Siyasiy mabüslerge qol tutuv programmasınıñ reberi, «Memorial» aq qorçalayıcı merkeziniñ şura azası Sergey Davidisniñ bildirgenine köre, merkezleriniñ cedvelinde 315 insan bar, 59-ı – qırımtatarıdır.
