Ukraina Tış işler naziri Dmıtro Kulebanıñ fikirince, Rusiye «Qırım platformasınıñ» muvafaqiyetini eksiltmege» tırışacaq. Bu aqta o, «Obozrevatel» ukrain haber agentligine intervyüda ayttı.
«(Rusiye vekilleri – QA) kelsin. Qırımnı qaytaruv ile bağlı muzakere esnası kerek. Muzakerelerniñ kün tertibinde tek bir mesele olacaq – Rusiyeniñ Qırım Muhtar Cumhuriyeti ve Aqyardan çıqmasınıñ modalligi ve bu topraqta Ukraina suvereniteti ve yurisdiktsiyasınıñ ğayrıdan tiklenmesidir. Olarnen başqa laf etecek bir şeyimiz yoq. Davet etem!», – dep bildirdi Kuleba.
Kuleba, «sorav, media cevapları, tış siyaset mütehassıslarınıñ cevaplarına köre – bu teşebbüs («Qırım platforması» – QA) tam oldı», dep qayd etti.
Rusiye, Kulebanıñ beyanatını daa izaatlamadı.
Nazir Kuleba Rusiyeniñ, hususan Rusiye Devlet dumasınıñ deputatı, Qırımnıñ sabıq Rusiye prokurorı Natalya Poklonskayanıñ Dnipro suvınıñ Qırım içün kesilmesi sebebinden Birleşken Milletlerge muracaat etmek ıntıluvları neticesiz olacaq, dep tüşüne.
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
