Ukraina Tış işler nazirligi yarımadanı işğalden qurtarmaq içün Qırım platforması çerçivesinde nevbetteki etap başladı, dep bildirdi. Bu aqta nazirniñ birinci muavini Emine Ceppar oktâbrniñ 20-nde AB Ukraina elçisi Matti Maasikas ile körüşip ayttı.
«Devlet reberligi başlatqan faal advokatsiya fazası halqara ortaqlarımıznı Ukraina prezidenti teklif etken Qırım platforması kampaniyasınıñ tafsilâtları ve substantiv qısmından haberdar etmekten ibarettir», – dep bildire Cepparnıñ aytqanlarını nazirlikniñ matbuat hızmeti.
Ukraina diplomatı, Qırım platforması halqara toplulıqnıñ Qırımnıñ işğalini toqtatuv areketleriniñ koordinatsiyası ve semereligini arttıruv ve qırımlılarnıñ aq ve menfaatlarını qoruv, em de bu meselede işbirliginiñ bütün bar olğan ve yañı fortmalarınıñ formalizatsiyası ve sistematizatsiyası içün yañı halqara format olacaq, dep ayttı.
«Platforma Rusiyeniñ Qırım yarımadasını ilhaq etmek ıntıluvını qabul etmeme halqara siyasetiniñ pekitilüvine, Qara ve Azaq deñizlerinde Rusiye askeriyleştirilüvi neticesinde artqan telükesizlik telükelerine cevap bermek içün qoşma imkânlar berecek, sanktsiyalar vastasınen Kremlge qarşı siyasiy basqını birleştirmege ve insan aqları bozuvlarına qarşı areket etmege yardım etecektir», – dep qayd etti Emine Ceppar.
Nazirniñ birinci muavini qayd etti ki, Maati Maasikasnıñ yardımınen eñ yaqın vaqıtta AB Ukraina temsilciliginde AB aza memleketleri içün brifing ötkerilecek. Platformanıñ Avropa Birligi yönelişinde faaliyet fikirleri taqdim etilecek.
Türkiye prezidenti Recep Tayyip Erdoğan Ukraina prezidenti Volodımır Zelenskıy ile yapqan beyanatında Ankara Qırım platforması çerçivesinde Kyiv ile işbirligi yapmağa azır, dep bildirdi.
Bu beyanatını Rusiye kontrolindeki senatorlar ve qırımlı deputatlar tenqit etti.
Qırımnı işğalden qurtaruv halqara meydançığı – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
