Qırımnıñ Rusiye tarafından işğal etilgeniniñ yılında Ukraina Tış işler nazirligi yarımadada qırımtatarlarğa ve ukrainlerge qarşı yapılğan repressiyalarnı qayd etti.
«Rusiye işğalci devlet olaraq halqara vazifelerini körmemezlikke ura. İşğalci, ukrain kimliginiñ kösterilüvini bile ağır cinayet dep saya. Qırımnıñ tamır halqı – qırımtatarlar – repressiyalarğa oğray. Sahte qabaatlavlar esasında siyasiy sebeplerden başlatılğan taqipler Rusiye işğalci akimiyeti içün adiy bir şey oldı», – dep aytıla Ukraina nazirliginiñ beyanatında.
Nazirlik, «Rusiye ordusına qanunsız askerlikke aluv, Qırımda Ukraina vatandaşlarına berilgen mecburiy pasportlar ve yarımadanıñ tez askeriyleştirilüvini» qayd etti.
«Halqara silâlı zıddiyetniñ tarafı olğan Rusiyeden vazifelerini şartsız yerine ketirmesini, halqara formatlar çerçivesinde tizilgen añlaşmalar esasında Donbasta ateşni toqtatmasını ve vaziyetni al etmesini talap etemiz», – dep aytıla Ukraina Tış işler nazirliginiñ beyanatında.
Müessise, halqara toplulıqnı «Ukrainağa qarşı silâlı istilânı toqtatmaq ve qanunsız şekilde tutulğan Ukraina vatandaşlarını azat ettirmek içün Rusiyege siyasiy-diplomatik ve iqtisadiy basqı quvetleştirmesine çağırdı».
Bundan evel Qırımnıñ Rusiye ilhaqı başlağanınıñ yılında Büyük Britaniya Ukraina topraq bütünligine qoltutıp, Rusiyeni yarımadadan ketmesine çağırdı. ABD, Kremlniñ Qırım iddialarını qabul etmeycek, dep bildirdi.
2016 senesi fevral ayında Avropa parlamenti Rusiye işğal etken Qırımda hususan qırımtatarlarnıñ ve umumen qırımlılarnıñ aqlarını bozulğanını takbih etken qararnı qabul etken edi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
