Ukraina Tış işler nazirligi Rusiyeniñ Rostov vilâyetinde işğal etilgen Donetsk ve Lugansk vilâyetleriniñ topraqlarında (İDLVT) yaşağan Ukraina vatandaşlarına Rusiye pasportlarını berüv merkeziniñ işke başlamasına qarşı narazılıq bildirdi, dep haber ete Azatlıq Radiosı.
«Rusiye yapqan areketlerinen halqara uquq normaları ve esaslarını ihmal etkenini köstere. Rusiye Federatsiyası kerginleşüv yolunı saylap, taraflardan biri olğan Minsk añlaşmalarını boza. Ukraina Tış işler nazirligi Ukraina vatandaşlarına Rusiye vatandaşlığını aluvnı qolaylaştıracaq qanunsız qararlar uquqiy ceetten müimsiz ola ve Ukraina tarafından tanılmay, dep bildirdi», – dep aytıla Tış işler nazirliginiñ saytındaki beyanatta.
Berilgen malümatqa köre, Ukraina halqara ortaqlarnı vaqtınca işğal etilgen Donbas topraqlarında yaşağan Ukraina vatandaşlarına Rusiyeniñ bergen vesiqalarını tanımamasına ve qabul etmemesine çağıra.
Daa evel Rusiyeniñ Rostov vilâyetinde işğal etilgen Donbas sakinlerine Rusiye pasportlarını bergen merkez açıldı.
Rusiye qoltutqan aydutlar tarafından kontrol etilgen Ukraina şarqındaki rayonlarnıñ sakinlerine Rusiye vatandaşlığını qolay almağa imkân bergen buyruqnı Rusiye prezidenti Vladimir Putin aprelniñ 24-nde imzaladı. Bu qararnı Ukraina ve ğarbiy ittifaqdaşları sert bir şekilde tenqit etti.
