Ukraina Tış işler naziriniñ birinci muavini Emine Ceppar noyabrniñ 16-nda Kanada ve Büyük Britaniya teşkil etken Kütleviy haber vastalarınıñ serbestligi birliginiñ aza memleketleri körüşüvinde dünya toplulığını Qırımda cemaat jurnalistleriniñ azat etilüvine yardım etmesine çağırdı. Bu aqta Ukraina Tış işler nazirliginiñ matbuat hızmeti bildire.
Ceppar, iştirakçilerge muracaat etip, vaqtınca işğal etilgen Ukraina topraqlarında kütleviy haber vastalarınıñ vaziyeti kritik ola, dep qayd etti. Onıñ aytqanına köre, repressiyalar ve Qırımnıñ Rusiye akimiyeti tarafından ayat telükesi sebebinden mustaqil jurnalistler işğal etilgen Donbasnı ve Qırımnı terk etmege mecbur edi.
«Qırım yarımadasında kerçek vaziyetni aydınlatuv vakuumını toldurmaq içün adiy vatandaşlar mustaqil media vazifelerini yapıp başladı, olarğa qarşı ise repressiyalar başlandı. Doquz cemaat jurnalisti – qırımtatarı – şimdi apiste buluna: Server Mustafayev, Timur İbragimov, Marlen Asanov, Seyran Saliyev, Remzi Bekirov, Ruslan Suleymanov, Osman Arifmemetov, Rustem Şeyhaliyev ve Amet Suleymanov. Olarnıñ azatlığı içün halqara toplulıqnı Rusiyege qarşı basqını quvetleştirmesine çağıram», – dep muracaat etti körüşüv iştirakçilerine o.
Nazirniñ birinci muavini Ukrainanıñ Rusiyeniñ sahte malümatı ile küreş yılları devamında qazanğan tecribesine diqqat celp etti. O, halqara ortaqlarnı Ukraina prezidentiniñ sahte malümat ile küreş halqara ofisiniñ merkezini Kyivde açmaq teşebbüsine qol tutmalarına davet etti.
ABD Devlet departamentiniñ Demokratiya, insan aqları ve emek meseleleri bürosı tahqiqat izolâtorında tutulğan üç qırımtatar cemaat jurnalistini «acele azat etmege» çağırdı.
Hatırlatamız, QMC Prokuraturası Qırımda jurnalistlerge qarşı yapılğan cinayetlernen bağlı 17 cinaiy davanı tahqi ete.
«Qırım birdemligi» teşebbüsiniñ faali Lutfiye Zudiyevanıñ aytqanına köre, al-azırda sekiz cemaat jurnalisti apiste buluna ve daa biri sağlıq vaziyetinden ev apsinde buluna.
Laf «Qırım birdemliginiñ» strimerleri ve cemaat jurnalistleri Server Mustafayev, Timur İbragimov, Marlen Asanov, Seyran Saliyev, Remzi Bekirov, Ruslan Suleymanov, Osman Arifmemetov, Rustem Şeyhaliyev ve Amet Suleymanov aqqında kete. Olar «sebepsiz tutulıp», siyasiy sebepli taqip ve sahte «terrorizm» qabaatlavlarınıñ qurbanları oldı.
2014 senesiniñ Rusiyeniñ Qırım işğalinden soñ mustaqil jurnalist, vatandaş faali, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
