Ukraina Tış işler naziriniñ birinci muavini Emine Ceppar Avstriyanıñ Ukraina elçisi Gernot Pfandler ile körüşti. Onıñ qayd etkenine köre, Ukrainanıñ işğal altındaki topraqları mevzusı halqara siyasette prioritet olıp qalmalı. Ceppar, Avstriya yarımadanı işğalden qurtaruv halqara Qırım platformasında iştirak etecek, dep ümüt ete.
Ukraina Tış işler nazirliginiñ haberinde aytılğanına köre, Ceppar Pfandlerge Qırımda insan aqları bozulğanını tarif etti.
«Tintüv, tutuv, uzun apis cezaları Qırımda er künlik kerçek oldı. 100-den çoq Ukraina vatandaşı – ekseriyeti qırımtatarlar ola – terrorizm ile küreş manaçığınen apishanede tutula», – dedi Ceppar.
Tış işler naziriniñ birinci muavini Azaq-Qara deñiz regionınıñ askeriyleştirilüvi ve yarımadanıñ Rusiye arbiy bazasına çevirilgenine diqqat ayırdı. Ceppar, Avstriya elçisine Rusiye vatandaşlarını Qırımğa avuştıruv siyaseti aqqında da tarif etti.
Ukraina prezidenti Volodımır Zelenskıy BM Baş Assambleyasınıñ 75-inci sessiyasınıñ umumiy munaqaşalarında çıqışta bulundı. O, Qırımda insan aqları vaziyetine dair yañı qararğa qol tutmağa ve yarımadanı işğalden qurtaruv halqara Qırım platformasınıñ qurulışında iştirak etmege çağırdı.
Ukraina Tış işler naziri Dmıtro Kuleba, onıñ nazirliginde Volodımır Zelenskıy içün Qırımnı işğalden qurtaruv muzakereleri içün halqara platformasını quruv teklifi azır, dep bildirgen edi.
Bundan evel Kulebanıñ qayd etkenine köre, Ukraina, Qırımnı işğalden qurtaruv halqara platformasınıñ liderlerinden biri Poloniya olacaq, dek bekley. O, Qırımnı işğalden qurtaruv meselesi boyunca halqara meydançıq işinde Rusiyeni körmey, dep aytqan edi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
Gernot Pfandler, Avstriyanıñ fikirleri deñişmey – «sıñırlar yañıdan sızılmay, Qırım – Ukrainadır», dep bildirdi.
