Ukraina Tış işler naziri Dmıtro Kulebanıñ aytqanına köre, Qırımnı işğalden qurtaruv platformasınıñ quruluvını başqa vaqıtqa qaldırmaq imkânsız. Bu aqta Ukraina Tış işler nazirligi Kulebanıñ gazeta.ua neşirine bergen intervyüsına esaslanıp bildire.
«Donbas içün «norman formatı» muzakereleri ve Minsk esnası bar. Qırım içün bir platforma qurulmadı. Amma bunı kene başqa vaqıtqa qaldırmaq mümkün degil. «Qırım formatı» olmalı. Erkânında Rusiye olmaycağını añlaymız. Amma Qırımnı işğalden qurtaruv halqara aletlerini birleştirmek içün format kerek. Eñ esası – qabul etmeme ve basqı siyaseti sarsılmaz olmasını temin etmektir», – dep tüşüne Kuleba.
Avgustnıñ soñunda Ukraina prezidenti Volodımır Zelenskıy Qırımnı işğalden qurtaruv boyunca muzakere esnasınıñ «norman dördü» çerçivesinde zor olğanını, bu meseleni kötermek içün başqa «qaviy platforma» alâ daa yoq, dep qayd etti.
Ukraina Tış işler naziri Dmıtro Kuleba, onıñ nazirliginde Volodımır Zelenskıy içün Qırımnı işğalden qurtaruv muzakereleri içün halqara platformasını quruv teklifi azır, dep bildirgen edi.
Bundan evel Külebanıñ qayd etkenine köre, Ukraina, Qırımnı işğalden qurtaruv halqara platformasınıñ liderlerinden biri Poloniya olacaq, dek bekley. O, Qırımnı işğalden qurtaruv meselesi boyunca halqara meydançıq işinde Rusiyeni körmey, dep aytqan edi.
Kuleba, Qırımnı işğalden qurtaruv meselesi Donbas boyunca «Minsk añlaşmalarından» ayrı baqılmalı, dep israr etken edi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
