Ukraina Tış işler naziri Dmıtro Kulebanıñ fikirince, Qırım mevzusı Ukrainada ve halqara kün tertibinde daa çoq yanğıramalı. O, Ukraina akimiyeti yarımadanı işğalden qurtaruvnıñ tam vaqtını «belgilemekten qorqmamalı», dep eminliknen ayta. Bu aqta o, «1+1» telekanalınıñ «Pravo na vladu» («Akimiyet aqqı») yayınında ayıttı.
«Büyük maqsad qoymaqtan qormamalımız, amma müim olğan daa bir şey bar – küreşimimizni toqtatmamalımız. Teslim olıp razı olsaq, o vaqıt Qırım ğayıp olacaq», – dep qayd etti Kuleba.
Onıñ aytqanına köre, şimdi esas vazifelerden biri – Qırım mevzusını halqara mevzular sırasına qaytarmaq ve Rusiyege qarşı basqını devam ettirmek. Kuleba, bu vazifeler hususan «Qırım platforması» çerçivesinde yerine ketirilecek, dep qayd etti.
Qırım işğali yılında «Büyük yedi» memleketleriniñ tış işler nazirleri Ukraina topraq bütünligi, suvereniteti ve mustaqilligine qol tuttı, dep bildirdi. G7 memleketleri de Ukrainanıñ «Qırım platformasını» quruv teşebbüsini alğışlay, dep bildirdi.
Ukraina prezidenti Volodımır Zelenskıy bu beyanatnı «dostluq işareti», Ukraina Tış işler naziri ise «küçlü bir signal» dep adlandırdı.
Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 23-nde olacaq, dep bildirgen edi.
Ukraina Tış işler naziriniñ birinci muavini Emine Ceppar Qırım.Aqiqat Radiosınıñ yaynında, kelecek yılnıñ mayıs ayında keçirilmesi planlaştırılğan yarımadanı işğalden azat etüv «Qırım platforması»sammitiniñ neticelerine köre muvafıq beyanname qabul etilecek, dep bildirdi.
Martnıñ 15-nde Rusiye Tış işler nazirliginiñ matbuat kâtibi Mariya Zaharova Kyivniñ Qırımnı işğalden qurtaruv ğayretleri qanunsız ola ve Rusiyeniñ eki subyekti – Qırım ve Aqyarğa qarşı istilâ telükesi olaraq sayıla bile, dep ayttı.
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
