Ukraina telükesizlik hızmeti ve Devlet arhiv hızmeti Qırımdaki sovet repressiv organlarınıñ arhiv vesiqalarına irişüvni açtı, dep bildirdi Azatlıq Radiosı Ukraina telükesizlik hızmetiniñ matbuat hızmetine esaslanıp.
«Aydınlatılğan malümatnıñ Rusiye ile gibrid cenk ve Qırım arhivleriniñ vaqtınca qapalı olması vaziyetinde müim emiyeti bar. Al-azırda keniş cemaatçılıqnı tarihiy aqiqatnen tanış etmek pek müimdir. Hususan, Qırım yarımadasında kommunist totalitar rejimi kerçekleştirgen ve teşebbüsi Moskvadan kelgen büyük repressiyalar aqqında aytmaq kerek», – dep aytıla Ukraina telükesizlik hızmetiniñ haberinde.
Online baqılması mümkün olğan vesiqalar arasında:
- 1920-1922 seneleri ve 1928-1934 seneleri VÇK-OGPU organları ve 1920-1941 seneleri Qırımda mahkeme organları çıqarğan ölüm ükümleriniñ yerine ketirilüvi aktları;
- 1921-1922 seneleri Aqmescit, Aqyar ve Kefe şeerlerinde Devlet siyaset idaresiniñ prezidiumı ve Umumrusiye fevqulâde komissiyası Qırım kollegiyasınıñ toplaşuv protokolları;
- 1937 senesi Qırım Muhtar Sovet Sotsialistik Cumhuriyeti NKVD idaresi üçüniñ toplaşuv protokollarınıñ bir qısmı.
Ukraina devlet arhiviniñ resmiy internet portalında «Qırım vesiqaları» mahsus rubrikasında arhiv vesiqalarınen tanış olmaq mümkün.
«Qayd etilgen vesiqalarda repressiyalarğa oğrağanlar aqqında malümat ve fotoresimleri bar. Al-azırda Qırımdaki sovet devlet telükesizliginiñ repressiv faaliyetini aydınlatqan 106 arhiv davası belli, 30 davanıñ elektron kopiyası aydınlatıldı», – dep aytıla haberde.
Berilgen malümatqa köre, kelecek sene Ukraina telükesizlik hızmetiniñ arhivi kollektsiyağa Qırım Muhtar Sovet Sotsialistik Cumhuriyeti NKVD idaresi üçüniñ toplaşuv protokollarını ve 1937-1938 seneleri Qırım Muhtar Sovet Sotsialistik Cumhuriyetindeki ölüm fermanlarınıñ yerine ketirilüv aktlarını qoşmağa planlaştıra.
