Ukraina Silâlı quvetlerinde COVID-19 diagnozı tasdıqlanğan ilk ölüm qayd etildi. Bu aqta Azatlıq Radiosı Ukraina Silâlı quvetleri Baş ştabınıñ malümatına esaslanıp bildire.
«Aprelniñ 7-nde saba saat 7-de Silâlı quvetlerde SARS CoV 2 koronavirusı sebep olğan COVID-19 keskin nefes hastalığına oğrağan 4 kişi qayd etildi, olardan 1-i vefat etti», – dep aytıla haberde.
Berilgen malümatqa köre, İvano-Frankivsk vilâyetiniñ arbiy bölüklerinden birinde çalışqan qadın vefat etti. Martnıñ 20-nden berli o, keskin nefes yuqunçı diagnozınen ambulatoriya tedaviyinde bulundı. Martnıñ 27-nde alı fenalaştı, qadın Nadvornaya şeerindeki merkeziy rayon hastahanesine alındı, martnıñ 30-nda onı reanimatsiyağa keçirgenler, aprelniñ 6-nda saat 6:00-da o vefat etti.
Qadınnıñ COVID-19 diagnozı aprelniñ 6-nda aqşam tasdıqlandı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
