ABD Ukraina sebebinden Rusiyege qarşı qoyğan sanktsiyalar lâğu etilmeycek. Bunı Azatlıq Rudiosına ABD Devlet kâtibiniñ muavini Viktoriya Nuland bildirdi.
«Biz açıq şekilde bildirdik ve prezident Biden daa bir kere tekrarladı ki, Ukraina sebebinden Rusiyege qarşı qoyulğan sanktsiyalar, Rusiye Ukrainağa dair mevamını deñiştirmegence lâğu etilmeycek», ‒ dedi Nuland.
O, ABD Ukraina topraq bütünligi ve suverenitetiniñ tarafdarı olganını qayd etti.
«Prezident Ukrainanı Rusiye ile munasebetlerimizde büyük añlaşamamazlıq olğan bir ülke olaraq adlandırdı, amma siz de aytqanıñız kibi, Birleşken Devletler, yıllar devamında olğanı kibi şimdi de Ukraina severeniteti, mustaqilligi ve topraq bütünligi tarafdarıdır», ‒ dedi Nuland.
ABD prezidenti Joseph Biden Rusiye prezidenti Vladimir Putin ile körüşüv vaqtında, Ukraina topraq bütünligi ve suverenitetine destek bildirdi.
İyunniñ 16-nda İsviçreniñ Jenevasında ABD ve Rusiye prezidentleriniñ sammiti olıp keçti.
