Ukraina koronavirus tarqaluvınıñ zirvesine yaqın, ve karantin ne vaqıt bitecegini aytmaq daa erte ola, dep tüşüne Ukraina sağlıq naziri Maksim Stepanov. Bu aqta Azatlıq Radiosı bildire.
«Pandemiyanıñ faal fazalarında hastalarnıñ sayısı tez arta, tibbiy sistema zorlana. Yani hastalarnıñ sayısı o qadar arta ki, olarğa yardım etecek ekim, ilâc, hastahanelerde yer yetmey. Ne yazıq ki, bir çoq memlekette bu oldı», – dep ayttı Stepanov aprelniñ 7-nde video muracaatında.
O, karantin ve özüni tecrit etüvge riayet etmege çağırıp, biznes ve göñüllilerge destek içün teşekkür bildirdi.
Daa evel Sağlıq nazirligi Ukrainada COVID-19 hastalığınıñ zirvesi aprelniñ 14-15-nden soñ olacaq, dep tahmin etken edi.
Ukrainada koronavirus qırğınlığı sebebinden quvetleştirilgen karantin tedbirleri aprelniñ 24-ne qadar devam etecek.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
