Ukraina sağlıq naziri İllâ Yemets memlekette fevqulâde vaziyet ilân etilmesini istey. Bu aqta müessiseniñ matbuat hızmeti bildire.
«Ükümette çalışqan birinci künümden berli bunı aytam. Bunı başından berli yapmaq kerek edi. Bu olsa edi, şimdi geometrik ilerilegen tarqaluv olmaz edi», – dep qayd etti İllâ Yemets.
Onıñ aytqanına köre, Ukrainada koronavirus tarqaluvınen semereli küreşmek içün ukrainalılar añlı tarzda yanaşmağa, diger insanlarnen bağlarını toqtatmalı, gigiyena qaidelerine riayet etmeli ve Sağlıq nazirliginiñ tevsiyelerini yerine ketirmeli.
Ukrainada COVID-19 koronavirus hastalığına oğrağan 73 insan qayd etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
