Ukraina sıñırcıları bir kün evel, iyün 5-inde furtuna sebebinden kursunı deñiştirip, Qara deñizde Ukraina suvları mıntaqasına kirgen Melita Rusiye bayraqlı yük gemisini tutıp almamaq qarar berdi. Bu aqta Ukraina Arbiy Deñiz Quvetleriniñ matbuat hızmeti bildirdi.
Ukraina Devlet sıñır hızmetiniñ hadimleri Rusiye deñizcilerni sorğuğa çekti.
“Olğan vaziyetni köz ögüne alıp, ve Deñiz suvları mıntaqası aqqında Halqara şartnameniñ nizamnamesine ve Deñiz aqqı boyunca BMT-niñ şartnamesine binaen, MELITA gemisi, ücüm, ekipaj tintüvi ya da tevqifi yapılmadan, havfsız yolnen ozğarıldı. Amma Rusiye Federatsiyasınıñ başlığı 2018 senesi noyabr 25-inde bir qaç halqara añlaşmanı bozıp, Ukraina Silâlı Quvetlerniñ Arbiy Deñiz Quvetlerine ait olğan kater ve gemilerni Keriç boğazınıñ neytral suvlarında tutıp aldı”, - denile beyanatta.
Matbuat hızmeti, MELITA gemisi Astrahan - Köstence yolunen ketkenini ve marşturından 5 milâdan az mesafege uzaqlaşqanını bildirdi.
