Ukraina sıñırcıları Ukraina prezidentiniñ saylavları keçirilecek vaqıtqa işğal altındaki Qırımnıñ memuriy sıñırında telükesizlik tedbirlerini quvetleştirecek, dep bildire Ukraina Devlet sıñır hızmeti Azaq-Qara deñiz regional idaresiniñ matbuat hızmeti.
«Kontrol noqtalarında keçiş tedbirleriniñ keçirilmesini tezleştirmek içün sıñır kontroli kerçekleştirilecek iş yerleriniñ arttırılması planlaştırıla. Bundan ğayrı, memuriy sıñırdan keçüv nizamında bir de bir deñişme olmağanını hatırlatamız. Qanunlarğa köre, Qırımğa kirip çıqmaq tek «Kalançak», «Çaplınka» ve «Çonğar» keçiş noqtalarından mümkün», – dep aytıla haberde.
Hatırlatamız, Ukraina prezidenti saylavlarınıñ birinci turı mayısnıñ 31-nde olacaq. Namzetlerden iç birisi saylayıcılar reyleriniñ 50%-nı qazanmasa, aprelniñ 21-nde saylavlarnıñ ekinci turı olacaq.
Daa evel haber etilgeni kibi, 2019 senesi yanvar ayında 2018 senesi dekabr ayına baqqanda Qırım ve esas Ukraina arasında yolcularnıñ sayısı 17%-ğa arttı.
Ukraina Devlet sıñır hızmetiniñ qayd etkenine köre, 2019 senesi yanvar ayında 2018 senesi yanvar ayına baqqanda memuriy sıñırdan eki tarafqa keçken vatandaşlarnıñ sayısı 10% az edi.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
