Ukraina Devlet sıñır hızmeti içtimaiy ağ qullanıcılarınıñ Qırım ve Herson vilâyetiniñ memuriy sıñırından tek çetel pasportınen keçmek mümkün olacağına dair malümatını red etti. Bu aqta Devlet sıñır hızmeti Azaq-Qara deñiz regional idaresiniñ kütleviy haber vastalarınen bağ meseleleri sektorınıñ yolbaşçısı Maksim Soroka Qırım.Aqiqatqa bildirdi.
«Al-azırda qanunlarda bir deñişme yoq. Hatırlasañız, böyle malümat ilk sefer berilmey. Qanunlarda keçiş tedbirlernen bağlı resmiy bir deñişme yoq», – dedi Soroka.
Onıñ bildirgenine köre, vatandaşlarğa yetkizilecek resmiy bir malümat olsa, kütleviy haber vastaları içün saytta ya da matbuat konferentsiyası çerçivesinde resmiy malümat şeklinde olacaq.
Daa evel Qırım sakini Elzara Abduramanova «Kalançak» keçiş noqtasında «yañı yıldan başlap tek çetel pasportınen keçirecekler», dep yazdı Facebookta.
Onıñ qayd etkenine köre, Devlet sıñır hızmeti bu malümatnı inkâr ete.
Daa evel Ukraina Devlet sıñır hızmeti Qırım.Aqiqatnıñ informatsion muracaatına cevap berip, 2019 senesi 9 ay devamında işğal etilgen Qırımnıñ memuriy sıñırından eki tarafqa da eki milliondan çoq insan keçti, dep bildirdi.
2019 senesi noyabr ayında Qırım ve Herson vilâyetiniñ memuriy sıñırından keçken insan ve naqliyat vastalarınıñ sayısı oktâbr ayına baqqanda eksildi.
Qırım ve Herson vilâyetiniñ memuriy sıñırında noyabrniñ 15-nde yañartılğan «Çonğar» ve «Kalançak» keçiş noqtalarında areket açıldı.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
