Link açıqlığı

Saatnıñ esas haberi

Ukraina sıñırcıları Qırımnıñ memuriy sıñırında yolcularnıñ sayısı eksilgenini qayd ete


Nümüneviy resim
Nümüneviy resim

Ukraina sıñırcıları avgust ayında Qırım ve Herson vilâyetiniñ memuriy sıñırında yolcularnıñ sayısı eksilgenini qayd ete. Bu aqta Ukraina Devlet sıñır hızmetiniñ Azaq-Qara deñiz regional idaresiniñ haberinde aytıla.

Müessise malümatına köre, yaznıñ soñki ayında memuriy sıñırnı eki tarafqa 362876 insan ve 52928 naqliyat vastası keçti.

«Keçken seneniñ avgust ayına baqılsa, sıñırcılar qayd etilgen vatandaşlarnıñ sayısı 16044-ke ve naqliyat vastalarınıñ sayısı 4606-ğa eksilgenini qayd ete», – dep aytıla haberde.

Ukraina Devlet sıñır hızmetiniñ qayd etkenine köre, 2019 senesiniñ sekiz ayı devamında sıñırcılar eki tarafta 1 722 098 insannı qayd etti, bu raqam bıltır olğan raqamğa 23129-ğa az. Qayd etilgen naqliyat vastaları da 8089-ğa eksildi.

Müessiseniñ malümatına köre, vatandaşlarnıñ ekseriyeti soy-soplarını ziyaret etmek ve esas Ukrainada vesiqalarnı resmiyleştirmek içün memuriy sıñırdan keçe.

Avgust ayınıñ soñunda Qırımdaki Rusiye FSBsiniñ sıñır idaresi avgust ayında Herson vilâyeti ile memuriy sıñırda yolcularnıñ sayısı arttı, dep bildirgen edi.

2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».

XS
SM
MD
LG