Ukraina Devlet sıñır hızmetiniñ hadimleri bildirdi ki, esas Ukrainadan işğal etilgen Qırımğa ketken maşina teşkerilgende casuslıq aleti tapıldı. Bu aqta matbuat hızmeti haber ete.
Berilgen malümatqa köre, adise fevralniñ 22-nde «Çaplınka» keçiş noqtasında oldı. Keçiş noqtasına Ukraina vatandaşı, Herson vilâyetiniñ sakini, Citroen maşinasınen keldi.
Naqliyat vastası baqılğanda maşina içinde qolçaq yerinde sıñırcılar qalem şeklinde videokamerası ve malümat taşıyıcısı olğan aletni taptı.
Ukraina sıñırcılarınıñ bildirgenine köre, Ukraina qanunlarına köre, bunıñ kibi aletlerniñ qanunsız satın alınması, satılması, qullanuvı ve saqlanması cinaiy ya da memuriy mesüliyetke çekilüvniñ sebebi ola bile.
Sıñırcılar tapqanlarını Ukraina telükesizlik hızmetiniñ hadimlerine berdi. Olar ise vatandaşnı Ukraina Memuriy cinayetler kodeksiniñ 195-5 maddesi «Gizli malümat aluv mahsus tehnik vastalarınıñ qanunsız şekilde saqlanmasına» istinaden mesüliyetke çekti.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
