Üç taraflı kontakt gruppasında Ukraina delegatsiyasınıñ başı, birinci Ukraina prezidenti Leonid Kravçuk, Ukraina Rusiyeniñ er angi areketlerine, şu cümleden ücümge keçe bilecegine azır olmalı, dep bildirdi. Bunı o, «Amerika sesi» iştiragi ile Azatlıq Radiosı tarafındant yaratılğan «Nastoyaşçeye vremâ» telekanalınıñ "Saba" yaynında ayttı.
«Zelenskıynıñ Ukraina ücümni qaytarmağa azır olğanı aqqında sözlerini eşittim. Mesele şunda ki, o, yalıñız bugün degil, soñ yedi yıl azır dedi, tek azırlıq seviyesi türlü edi. Şunıñ içün Rusiye tecavuzını ne zaman başlaycağını qıyın aytmaq. Bu laflar artıq haber vastaları seviyesinde degil, o endi tış işler naziri (Sergey Lavrov – QA), Peskov (Putinniñ matbuat kâtibi Dmitriy Peskov – QA), yani devletler seviyesinde», dedi o.
«Cenk yarın başlaycaq» dep aytmaq mümkün degil, amma böyle ritorika, ordu toplanması ve Donbastki vaziyetniñ kerginleşmesi Rusiyeniñ arektleri er türlü ola bilecegini köz ögünde tutmaq kerek, dep qayd etti Kravçuk.
Prezident Volodımır Zelenskıy Donbasqa ziyareti vaqtında СNN-ge, Rusiye Ukrainağa ücüm ete bilecegi kerçektir ve devlet buña azır, dep ayttı.
Martnıñ 30-nda Ukraina silâlı quvetleriniñ baş komandanı Ruslan Homçak bildirdi ki, Rusiye, «Zapad-2021» strategik talimlerine azırlıq manaçığınen Ukrainanıñ şarqiy sıñırlarına taktik gruppalarını çeke.
Kreml, Rusiye ordusınıñ Rusiyede areket etmesi diger memleketlerni, hususan Ukrainanı qasevetlendirmemeli, dedi.
Ukrainanıñ ğarbiy ittifaqdaşları oña qol tutqanını bildirdi. Aprelniñ 2-nde ABD ve Ukraina prezidentleri Joseph Biden ve Volodımır Zelenskıy telefonda laf ettiler. Beyaz saraynıñ malümatına köre, «prezident Biden Rusiyeniñ Donbas ve Qırımdaki istilâsı vaziyetinde Ukraina suvereniteti ve topraq bütünligine qol tutqanını tasdıqladı».
Daa soñra Avropa Birliginiñ Tış siyaset ve telükesizlik siyaseti yuqarı temsilcisi Josep Borrell Ukraina akimiyetini Rusiye tarafından yapılğan istilâ vaziyetinde «Avropa Birligi destek köstergenine» işandırdı.
Sıñırda ve Donbasta olğan adise-vaqialar sebebinden NATO da Ukrainağa qol tutqanını bildirdi.
