Rusiye ordusınıñ silânı teslim etip, sarıp alınğan ve bombardıman neticesinde aman-aman bütünley viran etilgen Mariupol şeerini teslim etmek talabına Ukraina akimiyeti red cevabını berdi.
Rusiye bazarertesi künü saba beşke qadar cevap bermege talap etti, şartlar qoyuldı — başta şeerni onı mudafaa etken Ukraina bölükleri, soñra silâsız adamlar da terk etecek.
«Ordu silânı teslim etmeycek ve şeerni terk etmeycek», — dep ayttı martnıñ 21-ne keçer gecesi Ukraina baş nazir muavini İrına Vereşçuk.
Onıñ bildirgenine köre, Ukraina akimiyeti Rusiye tarafından silâsız adamlarnı Mariupolden Zaporijjâğa tahliye etmek içün gumanitar ayatnı acele açmasını talap ete.
Eki aftadan berli Mariupol qamaçavda qala. Rusiye arbiyleri adiy sakinlerni yibermey ve gumanitar yardım konvoylarını kirsetmey. Şeerde ateş açıla: meskün rayonlar, mektep, hastahanelerge. Ateş neticesinde loqsahane ve silâsız insanlar saqlanğan Dramatik teatr yoq etildi. Cenkten evel 400 biñden çoq insan yaşağan Mariupolde gumanitar felâket bar. Şeer Rusiye içün strategik ceetten pek müim, olar işğal altındaki Qırımğa qara ayat yapacaq olalar.
Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti. Bundan soñ Kyiv, Harkiv, Odesa, Kramatorsk, Berdânskta patlav ve raketa darbeleri aqqında haber etildi.
Ukraina prezidenti Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete. Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire.
Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire. Başta Rusiye arbiyleri ölgenini inkâr ettiler. Amma fevralniñ 27-nde Rusiye Federatsiyası Mudafaa nazirliginiñ resmiy vekili İgor Konaşenkov Ukrainada ölgen ve yaralanğan Rusiye askerleri bar, dep ayttı. Sayısını aytmadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
