«Operator GTS Ukrayını» şirketi «Gazprom» Rusiye gaz şirketi ile tizilgen Avropağa Rusiye gazınıñ tranzitine dair añlaşmağa köre Avropa qaideleri boyunca iş başladı, dep bildirdi, dep haber ete Azatlıq Radiosı.
«Yañı tranzit añlaşmasına köre ilk metr küb gazını Avropa Birligine naqil ettik, endiden soñ devletlerara noqtalarda Avropa qaidelerine köre, gaz naqil sisteması çalışa», – dep bildirdi Avropa birliginiñ normalarına uymaq içün qurulğan Ukraina gaz sistemasınıñ ayrı operator şirketi.
Şirket reberi Sergey Makogon öz tarafından şöyle qayd etti: «Operator GTS Ukrayını şirketiniñ ilk gecesi ştat rejiminde keçti. Yañı añlaşmanı yerine ketirüv çerçivesinde bütün tranzit nominatsiyalarını işlettik. Yañı Avropa qaidelerine köre çalışmağa azır olğanımıznı isbatladıq. Çalışmağa devam etemiz».
Dekabrniñ 31-nde OGTSU yanvarniñ 1-nden itibaren bütün qomşu operatorlar – Poloniya, Macaristan, Romaniya, Moldova, Slovakiya ve Rusiyenen – çalışmağa başlağan yañı añlaşma boyunca Rusiye gazınıñ Ukraina gaz naqil sisteması boyunca Avropağa tranzitini temin etmek içün kerek olğan operatorlarara añlaşmalarnıñ imzalanmasını bitirdi.
Dekabrniñ 30-nda «Naftoğaz» Milliy şirketi ve «Gazprom» Rusiye gazınıñ Ukraina gaz naqil sistemasını qullanaraq Avropa Birliginiñ qaidelerine köre beş yıl ve bu müddetni uzatmaq imkânınen Avropağa tranzitine dair añlaşmanı imzaladılar. Avropa bu añlaşmanı alğışladı.
