Ukraina Azaq deñizindeki istilâ sebebinden Rusiye ile olğan tahminen 40 añlaşmanı lâğu etmege niyetlene. Bu aqta Ukraina Tış işler naziri Pavlo Klimkin 1+1 kanalında «Pravo na vladu» yayınında bildirdi.
«Soñki vaqıt içinde 48 eki taraflı añlaşmanı «öldürdik», amma pek diqqatlı olmaq kerek, bu añlaşmalarnı «öldürsek», Ukraina vatandaşları zarar körmemeli. Nevbettekiler tez kelecek. Tahminen 40 añlaşma. Añlaşma bazamıznı ğayrıdan temelden baqamız», – dep qayd etti nazir.
Pavlo Klimkin sentâbrniñ 21-nde bildirdi ki, Kyiv Moskvağa dostluq añlaşmasını uzatmağa niyeti olmağanını haber etti.
Ukraina ve Rusiye arasında dostluq añlaşması 1997 senesi imzalanğan edi. Oña binaen, taraflar «biri-biriniñ topraq bütünligini ürmet ete ve aralarındaki sıñırlar deñişmeycegini kefil ete», em de «qurğan munasebetlerinde biri-biriniñ devlet sıñırlarını tanımağa, davalarnı barışıq bir şekilde bitirmege, küç qullanmamamağa» söz bereler.
Vesiqa on yılğa tizildi – 2008 senesi ise avtomatik bir şekilde uzatıldı. Añlaşmanıñ işini toqtatmaq içün Ukraina Rusiyeni eñ az sekiz ay ögüne haberdar etmeli.
Añlaşmanıñ iş müddeti toqtatılsın dep, Ukraina Rusiyeni resmiy şekilde nevbetteki on yıl bitkenine qadar eñ az altı ay qalğanda – yani 2018 senesi sentâbrniñ 30-na qadar – haberdar etmeli.
