Ukrayina ve Rusiye daa bir, 75-inci, esir deñişüvini kerçekleştirdi, 185 ukrayn arbiyi ve 2022 senesinden berli Rusiye quvetleri tutqan Ukrayina vatandaşı Rusiye esirliginden qayttı, dep haber etti iyünniñ 5-nde Cenk esirlerinen munasebet meseleleri koordinatsion ştabı.
"Ukrayina Silâlı quvetleriniñ arbiyleyeri, hususan Arbiy-deñiz quvetleri, Qara orduları, Desant-ücüm orduları, Territorial mudafaa, Mahsus operatsiyalar quvetleri, Arbiy nizam hızmetiniñ vekilleri, Ukrayina Milliy gvardiya ve Devlet sıñır hızmetiniñ askerleri. Bugün azat etilgen imayecilerniñ ekseriyeti 2022 senesi esir alındı, bir qısmı – Mariupol mudafaası vaqtında. Azat etilgenler arasında unikal vertolört operatsiyası – "Azovstalge" ava köprü iştirakçisi", – dep aytıla haberde.
Koordinatsion ştab qoşqanına köre, Donetsk, Lugansk, Harkiv, Herson, Zaporijjâ, Sumı, Kyiv ve Kursk yönelişinde cenkleşken ukrayinalılar esirlikten qayttı.
"Azat etilgen eñ yaş kişi – 26 yaşında, eñ büyügi 62 yaşında. Bugün azat etilgen eki ukrayinalı arasında eki zabit bar", – dep qayd etti ştab, Amerika Birleşken Devletler ve Birleşken Arap Emirliklerine deñişüvni teşkil etmege yardım etkenleri içün teşekkürler bildirip.
Koordinatsion ştab haber etkenine köre, azat etilgen er kes "tibbiy teşkerüvden keçecek, tedaviylenecek, ilk zamanğa kerekli şeylernen temin etilecek, kerekli tölevler alacaq, reabilitatsiyadan keçecek ve Rusiye esirliginde uzun izolâtsiyadan soñ cemiyetke reintegratsiya etilecek".
Rusiye Mudafaa nazirligi haber etkenine köre, deñişüv neticesinde qaytarılğan 185 Rusiye arbiyi Beyazrusiyege ketirildi.
Keçken ay prezident Volodımır Zelenskıy ilk etapı mayısnıñ 15-nde olğan "1000-ge 1000" formatında esir deñişüviniñ yañı etaplarına azırlıq devam ete, dep bildirgen edi.
İyünniñ 4-nde Zelenskıy Rusiye prezidenti Vladimir Putinge açıq mektübini aydınlatıp, "körüşüv kününi" belgilemege teklif etti ve Ukrayina "er kesni er keske" printsipinen cenk esirlerini deñiştirmege azır, dep qayd etti.
Martnıñ 26-nda Cenk esirlerinen munasebet meseleleri koordinatsion ştabı quruluvınıñ dördünci yılında Zelenskıy dört yıl içinde 8669 Ukrayina vatandaşı evine qaytarıldı, dep bildirdi – em arbiy, em adiy vatandaş.