Ukraina Milliy telükesizlik ve mudafaa şurasınıñ kâtibi Oleksiy Danılov parlament mebuslarınıñ “belli bir kategoriyasına” qarşı sanktsiyalarnı qoyuluvını ilân etti. Bu aqta o, “Savik Şusternıñ söz serbestligi” programmasınıñ yaynında ayttı, dep haber ete Azatlıq Radiosı.
“Eminim ki, yaqın vaqıtta em hususiy, em uquqiy şahıslarğa qarşı sanktsiyalar qoyulmağa devam etilecek. Bundan ğayrı, olarnıñ sırasında bugünde Yuqarı Rada mebusları olğanlar da olacaq. Sanktsiyalarnı qoymaq içün bayağı delilimiz endi bar”, – dedi Danilov.
Ukraina İç işler naziri Arsen Avakov, "112-Ukraina", NewsOne ve ZIK telekanallarına qarşı sanktsiyalar qoyuluvını “Ukraina topraqlarınıñ, şu cümleden Rusiye işğal etilken Qırımnıñ azat etilmesiniñ başlanuvı”, dep sayğanını bildirdi.
Kiçik aynıñ 2-nde Ukraina prezidenti Volodımır Zelenskıy Milliy telükesizlik ve mudafaa şurasınıñ “Muhalefet platforması – Yaşayış içün” fraktsiyasından millet vekili ve Rusiye tarafdarı siyasetçi Viktor Medveçuknıñ safdaşı Taras Kozakqa ve sekiz uquqiy şahısqa qarşı sanktsıyalar qoyuluvı aqqında qararını işke tüşürdi. Sanktsiyalar "112 Ukraina", NewsOne ve Zik telekanallarnıñ blok etilmesini közde tuta.
