Ukraina Qızıl Haç Halqara komitetinden Rusiye arbiyleriniñ cesedlerini Rusiyege çıqarıluvında yardım etmesini rica ete. Bu aqta Ukraina baş nazir muavini, vaqtınca işğal etilgen topraqlarnıñ reintegratsiya meseleleri naziri İrına Vereşçuk bildirdi.
«Biz Halqara Qızıl Haçtan Rusiye askerleriniñ cesedlerini Rusiye Federatsiyasına çıqarmağa yardım etmesini rica etemiz. Biñlernen işğalciniñ cesedi. Bu gumanitar bir ihtiyac. Biz Rusiye işğalcileriniñ cesedleri Ukrainanı terk etsin ve Rusiye Federatsiyasına ketsin isteymiz. Rusiye Federatsiyasında böyle cesedlerniñ sayısını ve bugün Ukraina toprağında yatqan işğalcilerniñ sayısını bilmek kerekler. Qızıl Haç, bu gumanitar problemni çezmek içün eliñizden kelgenini yapıñız. Biz rusiyelilerge daa bir kere muracaat etemiz, oğullarıñız, erkekleriñizniñ cesedleri az olsun dep, eliñizden kelgenini yapıñız. Aks alda biñlernen ölü olacaq, daa bir kere rica etem», – dep ayttı video muracaatında Vereşçuk.
Ukraina silâlı quvetleri Qara quvetleriniñ malümatına köre, rusiyeliler arasından 3,5 biñden çoq ölü ve aman-aman 200 esir bar.
Ukrainada Rusiye ücüm etken soñ arbiy vaziyet ilân etildi. Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti.
Prezident Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete. Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire.
Fevralniñ 24-nde Kreml Putinniñ ücümniñ maqsadı «Ukrainanı askeriysizleştirüv ve denatsifikatsiyası» olğanına dair aytqanlarını tekrarladı.
Rusiye ücüminiñ ekinci kününde Ukraina prezidenti Volodımır Zelenskıynıñ matbuat kâtibi Sergey Nikiforov Ukraina Rusiye ile muzakerelerden vazgeçmedi ve taraflar muzakere esnası olacaq yer ve vaqıtnen bağlı mesleatlar keçire, dep bildirdi.
