Ukraina işğal etilgen Qırımnı bir vaqıt Rusiye toprağı dep tanımaycaq. Bu aqta baş nazir muavini, Ukrainanıñ vaqtınca işğal etilgen topraqlarınıñ reintegratsiya meseleleri naziri İrına Vereşçuk GB News Britaniya kanalınıñ yayınında ayttı.
«Bu (Qırımnıñ «Rusiye» olaraq tanıluvı – QA) bir vaqıt olmaycaq. Biz 2014 senesi tanımağanımız kibi, Qırımda Rusiye akimiyetini tanımaycaqmız. Ukraina halqı buña izin bermez. Ukraina toprağı tam ve bölünmez qalsın dep, pek çoq can ketti ve çoq qan töküldi», – dep ayttı Vereşçuk.
Qırımtatar Milliy Meclisi, Qırımnıñ Kyiv kontroli altına qaytarıluvı Rusiye ile muzakerelerde bir şart olmalı, dep bildirdi.
Martnıñ 7-nde Rusiye prezidentiniñ matbuat kâtibi Dmitriy Peskov Rusiyeniñ Ukrainağa qarşı cenk toqatıluv şartlarından biri Kyivniñ Qırımnı Rusiye olaraq tanıması ola, dep bildirdi.
Ukraina prezidenti Volodımır Zelenskıy Kremlniñ işğal altındaki Qırımnı «Rusiye» olaraq tanımaq talabını izaatlap, Kyiv ultimatumlarğa azır degil, amma Kremlniñ talaplarınen bağlı «belli bir qararları» ola bile, dep ayttı.
Ukraina akimiyeti Qırım ve işğal etilgen Donbas topraqlarını diplomatik yollarnen kontrol altına almağa tırışacaq, dep çoq aytqan edi.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrainağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
