Ukraina, işğal etilgen Qırımda olğan bozuvlarğa UNESCOnıñ diqqatını muntazam sürette celp etecek. Bu aqta Ukraina Tış işler naziriniñ birinci muavini, UNESCO işleri Milliy komissiyasınıñ yolbaşçısı Emine Ceppar ayttı.
«Rusiyeniñ qanunsız Qırım işğali şaraitlerinde Ukrainanıñ UNESCO faaliyetiniñ prioritetli yönelişi vaqtınca işğal etilgen yarımadada olğan keskin problemlerge halqara toplulıqnıñ diqqatını celp etmek içün teşkilât imkânlarınıñ qullanılması olacaqtır», – dep aytıla Ukraina Tış işler nazirliginiñ haberinde.
Ukraina Tış işler nazirligi qayd etkenine köre, Qırımda medeniy ve tarihiy qıymeti olğan obyektler içün telükeli olğan Rusiye areketleri aqqında UNESCOğa muntazam sürette haber etmeli.
Tış işler naziriniñ sabıq muavini Serğiy Kıslıtsâ Parijde UNESCO Baş konferentsiyasınıñ 40-ıncı sessiyasında çıqışta bulunıp, Rusiyeniñ Qırımdaki areketleri Hersones ve Bağçasaraydaki Han sarayı içün «ciddiy telüke» ola, dep bildirdi.
Rusiye Tış işler nazirligi, Qırımda yapılğan qazmalar sebebinden Ukraina tarafından Ermitaj ve Puşkin müzeyine qarşı kirsetken sanktsiyalarnı tenqit etti.
Qırım işğalinden soñ Rusiye Qırımda medeniy ve tarihiy emiyeti olğan bütün obyektlerni öz yurisdiktsiyası altına aldı. Kyiv, olar Ukraina halqına ait olğanını israr etip, mezkür obyektlerni UNESCO imayesi altına almağa rica ete.
2019 senesi sentâbr ayında UNESCO baş müdiri Audrey Azoulaynıñ maruzası aydınlatılğan edi, anda yarımadada vaziyet kerginleşe, dep qayd etile.
Qırımnıñ Rusiye akimiyeti UNESCO maruzalarında berilgen malümatnen razı degil. Qırımnıñ Rusiye medeniyet naziri Arina Novoselskaya UNESCO vekillerini yarımadağa davet etip, medeniy ve tarihiy obyektlerniñ vaziyetine «tarafsız qıymet kesmege» teklif etken edi.
UNESCO Dünya mirası cedveline işğal altındaki Qırımnıñ «Tavrik Hersones» qoruğı kirmekte. Cedvelge kirsetilecek namzetler arasında Bağçasaraydaki Hanlar sarayı, Sudaqtaki Ceneviz qalesi, Qırım astrofizik observatoriyası, Manğup Qale, Eski Kermen ve Çufut Qale bar.
