Ukraina baş nazir muavini – vaqtınca işğal etilgen topraqlarnıñ reintegratsiya meseleleri naziri Oleksiy Reznikov Rusiye işğal etken Qırım yarımada işğalden qurtarılğanına qadar Dnipro suvını almaycaq, dep israr ete. Onıñ bildirgenine köre, Ukraina Qırımda suv yetmegeni içün ücüm ete bilgen Rusiyege «qarşı tirenmege» azır.
Bu aqta o, «Ukrinform» agentligine bildirdi.
«Biz qorqmaymız. Bugün er angi areketke azırmız. 6 yılda qorqumız bitti. Bugün bam-başqa azırlığımız, bam-başqa ordumız bar, o, duşmanğa qarşı çıqa bile», – dedi Reznikov.
Onıñ qayd etkenine köre, suvnı Qırımnıñ işğalden qurtarılğanından soñ berüv printsipial meseledir.
«Ebet, bu printsipial mesele: Qırım işğalden qurtarılacaq, suv teminatı ğayrıdan tiklenecek. İşğalci Rusiye memuriyetine yardım etmege niyetimiz yoq», – dep qoştı Reznikov.
«Proekt» Rusiye neşiri iyünniñ 3-nde bildirdi ki, işğal altındaki Qırımnıñ Rusiye akimiyeti yarımadanıñ suv meselesini çezip olamay.
Rusiye kontrolindeki Qırım yolbaşçısı Sergey Aksenov, 2020 senesi 150 yıl içinde eñ quru oldı, dep bildire.
Soñki ayda Qırımnıñ suv anbarlarınıñ tolması 7,1 mln kubometr az oldı, dep qabul etti Suv hocalığı devlet komiteti.
Ukraina prezidentiniñ Qırım Muhtar Cumhuriyetindeki daimiy temsilciligi, Rusiye işğal etken Qırım ve Aqyarğa Şimaliy-Qırım kanalından suv berilüvi tek yarımada işğalden qurtarılğan soñ ola bile, dep hatırlattı.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
