Ukraina Mudafaa naziri Andriy Zağorodnük Ukraina Qırım ilhaqını tanuv meselesini Rusiye ile muzakere etmeycek, dep bildirdi. Nazir, Rusiye Tış işler nazirliginiñ memurlarından biriniñ Qırım ilhaqını tanımaq çağıruvını açıq provokatsiya dep saya.
Ukrinform malümatına köre, bu aqta Zağorodnük cuma künü Brüsselde Alyansnıñ merkezine yapqan eki künlik ziyareti ve NATO memleketleri mudafaa nazirlerinen muzakereler keçirgen soñ jurnalistlernen körüşip ayttı.
«Aslında, bu eki mesele ayırılmalı. Birincisi – böyle beyanatlarğa nasıl yanaşamız? Böyle beyanatlarnı provokatsiya dep sayamız, Ukrainağa basqı yapmaq, belli añlaşmalarğa zorlamaq içün yapalar. Yani iç bir tanuv munaqaşaları olmaycaq. Bunı ciddiy şekilde aytmaq bile olmaz», – dedi nazir.
O, Azaq deñizindeki vaziyet kerçekten pek kergin olğanını tanıdı.
«Bizim vazifemiz – qabiliyetni quvetleştirmek, daa doğrusı olarnı qurmaq. Bunı da yapamız. Bu bizim strategiyamız, flot ve yalı mudafaası, ordularnıñ azırlanuvı, imkânlarnıñ arttırılması. Qara deñizge kirgen gemiler (NATO) – başlağan planımıznıñ bir parçası», – dedi Zağorodnük.
Ukraina Devlet gidrografiyası deñiz sıñırını belgilemek içün Rusiye ile muzakere esnasını başlatmağa çağırğan edi.
Avgust ayında Ukraina Devlet gidrografiyası yarımadanıñ bütün limanlarına kirişni yasaqlamaq içün işğal etilgen Qırım etrafında deñiz rejim rayonını ilân etmege planlaştıra, dep haber etilgen edi.
Rusiyeniñ qırımlı senatorları Sergey Tsekov ve Olga Kovitidi Ukraina akimiyetini Qırım etrafında rejim deñiz rayonını qurmaq niyetine açuvlanğan ediler.
2014 senesi iyül ayından berli Ukraina ükümeti Rusiye işğal etken yarımadanıñ bütün limanlarını qapattı, Qırım halqara gemiler içün qapalı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
