Ukraina baş nazir muavini, vaqtınca işğal etilgen topraqlarnıñ yañıdan integratsiya meseleleri naziri Oleksiy Reznikov emin ki, Ukraina prezidentlerinden iç birisi Qırımnı Rusiyege bermez.
Bu aqta o, Liga.net neşirine bergen intervyüsında ayttı.
Reznikovnıñ aytqanına köre, Rusiye «Donbasnen Qırımnı almaştırmağa» tırışqan edi.
«Olar Donbasnı Qırımğa almaştırmaqtan başlağan edi. Amma Ukraina iç bir vaqıt… Prezidentlerden iç kimse, kim olsa olsun, buña yol bermez. İmkânsız bir şey», – dep işandırdı Reznikov.
Ukraina baş nazir muavini qayd etkenine köre, Rusiye akimiyeti Donbas meselesinde bugünki vaziyetten çıquv variantlarını qıdıracaq, amma «betini saqlamağa» tırışacaq.
«Rusiyeliler pek pragmatik insanlar, eki yıldan berli olarnen muzakereler keçirem… Bu topraqlarnı tutmağa pek paalı olğanını, olardan bir fayda olmağanını, em de sanktsiyalar kelgenini añlasalar, bundan çıqacaq variantlarnı qıdıracaqlar. Ebet, betini saqlamağa tırışacaqlar. Kelişken bir format qıdıracaqlar. Şunıñ içün keçici müddetni temin etecek halqara barıştırıcı missiya kirsetilüvine azır olmalımız. Başqa türlü rusiyeliler topraqlarımızdan ketmege razı olmazlar», – dep añlattı Reznikov.
Kreml, Rusiye 2014 senesi işğal etken Qırımnıñ topraq mensüpligi meselesi muzakere etilmeycek, dep bildirgen edi. 2014 senesi AB ve ABD Qırım işğali sebebinden Rusiyege qarşı sanktsiyalar kirsetti.
İyül ayında Rusiye prezidentiniñ matbuat kâtibi Dmitriy Peskov Qırım bir vaqıt «kelişme mevzusı olmaycaq», dep ayttı.
Ukraina Tış işler naziri Dmıtro Kuleba «Ukraina Rusiyeni Qırımdan çıqaracaq», «Qırım platforması» ise buña yardım etecek, dep qayd aytqan edi.
Avgustnıñ 31-nde Rusiye Tış işler naziri Sergey Lavrov işğal etilgen Qırım Rusiye terkibinde qalacaq, dep bildirdi. O, Ukraina akimiyeti «bunı çoqtan añlap qabul etkeninden» emin.
Ukraina Tış işler nazirligi buña cevap berip, «Qırım meselesi qapatılmadı ve işğal bitken soñ çezilecek», dep bildirdi.
Donbastaki silâlı zıddiyet 2014 senesinden berli Rusiyeniñ Qırım işğalinden soñ devam ete. Ukraina ve Ğarp Rusiyeni separatistlerge silâlı yardım köstergeninde qabaatlaylar. Kreml bu qabaatlarnı red ete ve Donbasta ancaq Rusiye «göñüllileri» bar, dep israr ete. BM malümatına köre, 2014 senesi aprel ayından başlap 2020 senesi iyülniñ 31-ne qadar silâlı zıddiyet neticesinde Donbasta 13100 - 13300 insan elâk oldı.
