Ukraina prezidentiniñ Qırım Muhtar Cumhuriyetindeki daimiy vekiliniñ birinci muavini İzet Gdanov istifağa ariza berdi.
«İstifa arizasını bermege qarar aldım, amma Rusiye işğalcilerinden serbest olacaq Qırımnıñ qaytarıluvı oğrunda küreşimni iç bir vaqıt bitirmeycem! Temsilcilikniñ işi cemaatnıñ diqqatı altında edi, qala ve olacaq. Yarımada azat etilgenine qadar yarımadağa suv berilmemesi, işğalcilernen er angi işbirligi, sanktsiyalar ve bir sıra diger meseleler – er daim kontrol altında olacaq, cevap berecek mehanizmlerimiz bar», – dep yazdı Gdanov Facebook saifesinde.
Onıñ qayd etkenine köre, Qırımnıñ yañı statusınen (Qırımnıñ azat etilmesine doğru yol) bağlı deñişmelerniñ Ukraina Anayasasınıñ X bölügine kirsetilüvi üzerinde iş Ukraina Yuqarı Radası yañartılğan soñ er aylıq açıq esabatqa muhtac.
Hatırlatamız, iyünniñ 25-nde Anton Korineviç Ukraina prezidentiniñ Qırım Muhtar Cumhuriyetindeki daimiy vekili vazifesine tayin etildi. Prezident temsilciliginiñ resmiy saytında buña dair buyruq derc etildi.
Anton Korineviç – uquq ilimleri namzeti, dotsent, Taras Şevçenko Kyiv milliy universiteti Halqara munasebetler institutınıñ halqara uquq kafedrasınıñ dotsentidir. Qırım.Aqiqat Radiosınıñ yayınlarında iştirak etken edi.
Ukrainanıñ beşinci prezidenti Petro Poroşenko 2018 senesi dekabrniñ 2-nde Boris Babinni Ukraina prezidentiniñ Qırım Muhtar Cumhuriyetindeki daimiy vekili vazifesinden boşatuv fermanını imzaladı. Vesiqada aytılğanı kibi, Babin «bergen istifa arizası esasında» işten boşatıldı. Ukraina prezidentiniñ Qırımdaki daimiy vekiliniñ birinci muavini İzet Gdanov vazifelerini yapmağa devam etti.
İzet Gdanov 1983 senesi Özbekistannıñ Ferğana şeerinde dünyağa keldi. 2006 senesi Ukraina devlet bergi hızmetiniñ milliy akademiyasında «Müessise iqtisadiyatı» bölügini bitirip, iqtisatçı ihtisasını aldı. 2006 senesinden 2009 senesine qadar Aqmescitteki ticaret müessisesiniñ reberlik vazifelerinde bulundı.
2009 senesinden 2017 senesine qadar Qırım Muhtar Cumhuriyetiniñ Yuqarı Rada yardımcısı, Aqyar şeer devlet memuriyetiniñ reis mesleatçısı, Qırım Muhtar Cumhuriyeti sanayı siyaseti, naqliyat, bağ ve yaqıt-energetika kompleksiniñ nazir muavini, Qırım Muhtar Cumhuriyetiniñ Naqliyat ve bağ nazirliginiñ maşina taşımacılığı ve bağ idaresiniñ yolbaşçı muavini, Ukraina halq deputatınıñ yardımcısı olğan edi.
2017 senesi avgust ayından berli Ukraina prezidentiniñ Qırım Muhtar Cumhuriyetindeki daimiy vekiliniñ birinci muavini oldı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, diger strategik obyektlerni zapt etip, Ukraina ordusınıñ areketlerini blok etken edi.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
