Ukraina prezidentiniñ Qrım Muhtar Cumhuriyetindeki daimiy temsilcisi Anton Körineviç qırımlı ukrainlerge teşekkürler berdi. Bu aqta temsilcilikniñ matbuat hızmeti haber ete.
«Ukraina prezidentiniñ Qrım Muhtar Cumhuriyetindeki daimiy temsilcisi Anton Körineviç hayırlav nutuğında, işğalge qarşı çıkqqan ve Qırım ve Ukrainanıñ topraq bütünligi oğrunda küreşmege devam etken er kesge teşekkür bildirdi. Teşekkürlernen qayd etilgenlerniñ arasında arbiy hızmetçiler ve göñüller, cemaat aq qoruyıcı teşkilâtlarnıñ vekilleri ve medeniyet erbapları», – dep yazıla beyanatta.
Körineviç, Sergey Vikarçuk, Viktor Merjvinskiy, Aleksandr Kravçenko, Stepan Tsırilâ, Aleksey Nosanenko, Artöm Artühov, Yuriy Loşak, Dmitriy Tünіn, Dmitriy Gutman, Aleksey Polâkov, Vladimir Rahіmov, Pavel Korovâkovskiy, Stanіslav Patsıkovskiy, Böris Râbuh, Rustem Skibin, Lüdmila Şevçenkonı mukâfatladı.
Bundan ğayrı Ukraina prezidentiniñ Qrım Muhtar Cumhuriyetindeki Temsilciliginiñ yarlıqlarını «Qırım evi» ve arbiy areketlerde qırımtatar iştirakçılarnıñ «Qırım Ğazi» arbiy-vatanperver birleşmesi aldı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
