Qırım MC ve Aqyar şeerindeki Ukraina prezidentiniñ Temsilciligi avgustnıñ 17-nde qırımtatarlarnıñ evlerinde keçirilgen tintüvlerni takbih etti.
«Ukraina prezidentiniñ Qırım MC-deki Temsilciligi Rusiye işğalci memuriyetiniñ yañı cinaiy areketlerini qatiyen takbih ete. Bugün keçirilgen qanunsız tintüvler ve yaqalavlar, tamır qırımtatar halqınıñ ve olarnıñ temsilcileriniñ Qırımdan sıqıştırıp çıqaruv siyasetiñ devamıdır, aqlarnıñ qorçalavında birlikniñ bastırıluv eylemidir, diniy sebeplerden taqip eylemidir», – dep yazıla Temsilcilikniñ Facebook saifesinde.
Tesilcilikte qayd etkenlerine köre, Rusiye quvetçileriniñ areketleri Ukraina devlet organları tarafında vesiqalaştırılacaq ve mıtlaqa "yañı Nürnberg davasına" sebep olacaq.
«Qırım birdemligi» cemaat birleşmesiniñ faalleri, avgustnıñ 17-nde saba qırımtatrlarnıñ evlerinde keçirilgen tintüvlerden soñ beş insan yaqalanğanını bildireler.
Aqyarnıñ Nahimov rayonında FSB hadimleri Rustem Murasov ve Rustem Tairov,Aqyarnıñ Balıqlava rayonında Cebbar Bekirov, Bağçasaray rayonında Zaur Abdullayev, Aqmescit rayonında Raif Fevziyevni yaqaladı.
Faallerniñ malümatına köre, Cebbar Bekirov, Zaur Abdullayev ve Rustem Tairovnıñ evlerinde tintüvler Aqyarnnı Lenino rayon mahkemesiniñ qararı ile keçirildi.
Raif Fevziyevniñ evinde keçirilgen tintüvge avdokat Edem Semedlâyevni yibermegenler. Advokatnıñ malümatına köre, imam Rusiye CQ 205.5 maddesine binaen qabaatlana.
Ukraina Tış işler naziriniñ birinci muavini Emine Ceppar avgustnıñ 17-nde qırımtatarlarnıñ evlerinde keçirilgen tintüvlerge cevap berdi. O buña devam etken «qorqutuv siyaseti» dedi.
Ukraina Yuqarı Radasınıñ insan aqları vekâletlisi Lüdmila Denisova, avgustnıñ 17-nde qırımtatarlarnıñ evlerinde keçirilgen tintüvlerge qarşılıq kösterdi.
Ukraina prezidenti Volodımır Zelenskıy, Rusiye telükesizlik quvetleriniñ avgustnıñ 17-nde yarımadanıñ türlü köşelerinde qırımtatarlarnıñ evlerinde keçirgen tintüvlerge "insan aqlarınıñ qaba şekilde bozuluvı"dedi.
Ukraina TİN, avgustnıñ 17-nde yarımadanıñ türlü köşelerinde qırımtatarlarnıñ evlerinde Rusiye telükesizlik quvetleriniñ keçirgen tintüvlerine qarşı qatiy narazılıq bildirdi. Olarnıñ fikrince, bunıñ sebebi avgustnıñ 23-ne planlaştırılğan «Qırım platforması» sammitidir
Qırımdaki Rusiye qanınun qoruyıcı organlarnı vaziyetni tefsir etmeyler.
