Ukraina prezidentiniñ Qırım Muhtar Cumhuriyetindeki Temsilciliginiñ Herson ofisi Rusiye arbiyleri tarafından zapt etildi. Bu aqta temsilcilikniñ matbuat hızmeti martnıñ 27-nde haber etti.
«Bugün Temsilcilik Hersondaki ofisimizge işğalciler qanunsız kirgenini bildi: qapu qırıldı, devlet bayrağı alındı ve Temsilcilik binasında qalğan tehnika ve vesiqalarnı çıqarğandırlar. Belli organlar teşkerüv keçire. Provokatsiyalar ola bile ve biz vatandaşlarnı muqayt olıp, ofisni ziyaret etmekten vazgeçmelerine çağıramız», – dep aytıla haberde.
Temsilcilik, Hersondaki ofis cenk ve Rusiye tecavuzı sebebinden işini toqtattı, dep qayd etti.
«Temsilcilik hadimleri Temsilcilikke muracaat etken işğal etilgen Qırımdaki Ukraina vatandaşlarına yardım etmek ve vazifelerini yapmaq içün uzaqtan ve Ukraina ükümeti kontrol etken yerlerde çalışa. Temsilcilik ofisine cinaiy şekilde kirgen Rusiye arbiyleri ve Rusiye Federatsiyası mahsus hızmetleriniñ hadimlerine qanunsız areketlerini toqtatmağa ve Ukraina Silâlı Quvetlerine teslim olmağa tevsiye etemiz. Bu mesüliyet seviyesini eksiltip, ayatlarını qorumağa yardım eter», – dep bildirdi temsilcilik.
Ukraina ombudsmeniniñ ofisi Rusiye arbiyleriniñ işğali sebebinden Herson ve vilâyeti gumanitar felâketine yaqın oldı, dep bildirgen edi. Vilâyetniñ meskün yerlerinde elektrik, gaz ve suv problemleri bar, insanlarğa ilâc ve bazıda aş yetmey. Rusiye ordusı ateş açqanı içün anda bir şey taşımaq imkânsız ola.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrainağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3enufiq6nhnir.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
