Ukraina prezidentiniñ Qırım Muhtar Cumhuriyetindeki daimiy vekiliniñ muavini Tamila Taşeva, Rusiye akimiyeti qırımlılarnı milliy ve etnik mensüpligine köre taqip etmege devam ete, dep tüşüne. Bu şekilde o, noyabrniñ 12-nde Rusiye mahkemesiniñ Yaltadaki «Hizb ut-Tahrir davası» boyunca altı qırımlığa çıqarğan ükümni Qırım.Aqiqat Radiosınıñ yayınında izaatladı.
«Bu, diger qabaatlayıcı ükümler kibi, Qırımdaki ve Rusiyedeki lafta mahkemeler kibi açuvlandıra. Bu büyük apis cezaları. Amma epimiz añlaymız ki, bu davalar boyunca aqlayıcı ükümler yoq. Çünki Rusiye Ukraina vatandaşlarını Ukraina tarafdarları olğanı içün, qırımtatarlarnı ise millet ve din mensüpligine köre taqip etmek içün terrorizm ve ekstremizm ile küreş qanunlarını qullana. Biz devlet ve aq qorçalayıcılar olaraq bunı etnik sebeplerden taqip olaraq tasnif etemiz», – dep ayta Taşeva.
Rostov-na-Donu şeeri Cenübiy okrugınıñ arbiy mahkemesi noyabrniñ 12-nde Yaltadaki «Hizb ut-Tahrir davasınıñ» altı mabüsini koloniyada qalmasına üküm etti. Mahkeme qararına köre, Muslim Aliyev 19 yılğa, İnver Bekirov 18 yılğa, Emir-Usein Kuku 12 yılğa, Vadim Siruk 12 yılğa, Arsen Cepparov 7 yılğa ve Refat Alimov 8 yılğa üküm etildi. Olar sert rejimli koloniyada qalacaqlar.
Rusiyeniñ Amnesty International reisi Aleksandr Artemyev işbu ükümni «siyasiy taqip» dep adlandırdı.
Ukraina Tış işler nazirligi bu üküm sebebinden Rusiyege narazılıq bildirdi.
Bu dava boyunca qabaatlanğanlar 2016 senesi fevral-aprel aylarında Yaltada tutulğan edi. Olarnı Rusiyede yasaqlanğan «Hizb ut-Tahrir» islâm siyasiy teşkilâtına alâqaları bar olğanında qabaatlaylar.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
